Bambangi ya Yehova mesobaka Biblia samu yawizana na bindimeli na bau?

KUWA NA

Ve. Kutu, kana beto memona ti bindimeli na beto kele mpenzampenza ve na nguizani na Biblia, beto kesobaka yau samu yavuanda na nguizani na Biblia.

Beto vuandaka longuka Biblia bamvula mingi tekila beto banda kubimisa Biblia Libongoli ya Mokili ya Sika na 1950. Beto vuandaka sadila bambangudulu ya Babiblia yina vuandaka na ntangu yango mpe malongi na beto vuandaka katuka kuna. Tala ndambu ya mambu yina Bambangi ya Yehova kendimaka banda ntama, mpe nge mosi tuba kana yakele mpenza na nguizani na mambu yina Biblia kelongaka.

Dilongi yina beto kendimaka: Nzambi kele Butatu ve. Yinzo’a zulu ya Nkengi ya Siona ya juillet 1882 tubaka: “Bantu yina ketangaka mikanda na beto mezaba ti beto kendiminaka Yehova mpe Yesu, mpe Mpeve ya nlongo, kasi beto kemangaka mpenza dilongi yina katuka ve na Biblia, yina ketubaka ti yakele na Banzambi tatu na kati ya muntu mosi, to mpe mutindu bantu yankaka ketubaka ti, Nzambi mosi na kati ya bantu tatu.”

Mambu yina Biblia metuba: “Yehova Nzambi na beto kele Yehova kaka mosi.” (Kolimbola Mibeko 6:4, The Holy Bible, by Robert Young) “Beto kele na Nzambi mosi kaka, Tata na beto yina salaka bima nionso. Beto kezingaka samu na yandi. Mpe Mfumu mosi kaka Yesu Klisto. Nzambi salaka bima nionso na lusadusu na yandi, beto kezingaka mpe na lusadusu na yandi.” (1 Bakorinto 8:6, Bible en Kituba.) Yesu tubaka yandi mosi ti: ‘Tata meluta munu.’—Yoane 14:28, Bible en Kituba.
Dilongi yina beto kendimaka: Bilungi ya tiya kevuandaka ve. Na kutubilaka Baroma 6:23 na Biblia King James Version, Yonz’a zulu ya Nkengi ya Siona ya juin 1882 yina vuandaka na yintu ya diambu “Mfutu ya disumu kele lufua,” tubaka mutindu yayi: “Bampova yango kele puelele mpe pete mpenza. Yakele diambu ya kukamua ti bantu mingi yina ketubaka ti baketadilaka Biblia lokola Mpova ya Nzambi kena kutatamana kusoba bampova yango ya puelele, mpe bakena kutuba ti, samu na bau Biblia kelongaka ti mfutu ya disumu kele kuniokuama ya mvula na mvula na bilungi ya tiya.”

Mambu yina Biblia metuba: “Muela yina mesala disumu, yau nde kekufua.” (Ezekiele 18:4, 20, haut fleuve) Kitumbu ya nsuka samu na bantu yina keteleminaka Nzambi kele ve kuniokuama na bilungi ya tiya samu na mvimbamvimba, kasi yakele “kufua samu na mvimbamvimba.”—2 Batesaloniki 1:9, Bible na lingala ya lelo oyo.
Dilongi yina beto kendimaka: Kimfumu ya Nzambi kele guvernema mosi ya kedika, kasi yakele ve kima mosi yina kevuandaka na ntima ya muntu. Yinzo’a zulu ya Nkengi ya décembre 1881 tubaka samu na Kimfumu ya Nzambi ti: “Ntangu Nzambi ketula Kimfumu yango, yakebuisa bimfumu nionso ya ntoto.”

Mambu yina Biblia metuba: “Na bilumbu ya bantinu yango Nzambi ya dizulu ketelemisa kimfumu yina kebebisama ata fioti ve, mpe kimfumu yango kepesama na bantu yankaka ve; yakebuka mpe yakesukisa bimfumu yayi nionso, mpe yakebikana mvimbamvimba.”—Daniele 2:44, haut fleuve.

Bambangi ya Yehova kesadilaka kaka Biblia Libongoli ya Mokili ya Sika samu na kundimisa bindimeli na bau?

Ve, tii bubu yayi beto ketatamanaka kusadila bambangudulu mingi ya Babiblia na kisalu na beto ya kusamuna. Ya kedika, beto kepesaka bantu Biblia Libongoli ya Mokili ya Sika ntangu beto kelongisaka bau Biblia ofele, kasi beto kesepelaka kulonguka na bantu yina kesepelaka kusadila Mbangudulu ya Biblia ya bau mosi.