Ve. Ya kedika, beto kesamunaka mbala na mbala yinzo na yinzo, kasi beto ketulaka ve ntima ti beto kevuka samu beto kesamunaka yinzo na yinzo. (Baefese 2:8) Samu na yinki?

 Kanisa na kifuani yayi: Kanisa ti muntu mosi ya ntima mbote melaka kupesa kado mosi ya ntalu mingi na muntu nionso yina kekuma kisika mosi playi na dati yina yandi metula. Kana nge mendimina mpenza nsilulu ya muntu yango, nge kelanda malako na yandi? Kondua ntembe nge kelanda yau! Katula yau, nge ketubila diaka diluaku yango na bankundi mpe bantu ya dibuta na nge samu bau diaka babakila yau mambote. Atako plina, nge kebaka ve kado yango kaka samu nge kena kulanda malako ya muntu yango. Nge kebaka kado yango samu muntu yango nde mesepela kupesa nge yau.

 Mutindu mosi, Bambangi ya Yehova kendiminaka nsilulu ya Nzambi ya kupesa luzingu ya mvula na mvula na bantu nionso yina kezitisaka yandi. (Baroma 6:23) Beto kesalaka ngolo samu beto tubila bantu yankaka mambu yina beto kendiminaka, na kivuvu ti bau diaka bakebaka mambote na bansilulu ya Nzambi. Kasi beto kendimaka ve ti beto kevuka kaka samu beto kekuendaka na kisalu ya kusamuna. (Baroma 1:17; 3:28) Ya kedika, muntu mosi ve lenda baka lusakumunu yango ya Nzambi na bangolo na yandi mosi yavuanda yandi mesala bangolo ya yinki mutindu. Biblia metuba: “Yandi kukisaka beto samu na kiadi na yandi, kasi ve samu mambu ya mbote yina beto salaka.”—Tito 3:5, Contemporary English Version.