Mutindu na beto ya kutadila mpe kusadila mambu metadila mafua mesimbama na malongi ya Biblia, na kifuani malongi yayi melanda:

•   Kudila muntu mosi yina beto vuandaka zola kana yandi mekufua kele yimbi ve. Banlonguki ya Yesu dilaka bantu yina bavuandaka zola ntangu bakufuaka. (Yoane 11:33-35, 38; Misala 8:2; 9:39) Kasi, beto kekanisaka ve ti ntangu ya kudila mafua kele ntangu mosi ya kusala feti. (Mosakoli 3:1, 4; 7:1-4) Kutu, beto ketadilaka yau lokola ntangu ya kumonisa kiadi.​—Baroma 12:15.

•   Bantu ya kufua kezabaka kima mosi ve. Yavuanda beto kezingaka na yinki buala to beto kele bantu ya yinki dikanda, beto kemangaka mimeseno mpe mambu yina katuka ve na Biblia yina bantu kendiminaka; na kifuani muntu ya kufua kezabaka mambu to bantu ya kufua lenda sala beto yimbi to kusadisa beto. (Mosakoli 9:5, 6, 10) Na mambu yango beto lenda tanga kuleka na nganda tii na sunka, kudia to kunua na loyenge to kusala bafeti ya nzuna, kusala aniversere ya muntu ya kufua, kupesa bankayilu samu na bantu ya kufua, kusosa kusolola mpe kulomba bantu yina mekufuaka mambu, mpe kusala bankinzi samu na bakala to nketo yina mefuila nkuelani. Beto kemangaka mambu mpe mimeseno yango nionso samu na kuzitisa ntumu yayi ya Biblia: ‘Beno kabuana na bau, . . . mpe beno bika kusimba kima ya mvindu.’​—2 Bakorinti 6:17.

•   Kivuvu kele samu na bantu yina mekufuaka. Biblia kelongaka ti mfutumukunu kevuanda mpe yakevuanda na ntangu yina lufua kevuanda diaka ve. (Misala 24:15; Emoniseli 21:4) Kivuvu yango kesadisaka beto beto sala ve mambu kuluta ndilu ntangu beto mefuila, kaka mutindu yasadisaka Baklisto ya siekle ya ntete.​—1 Batesaloniki 4:13.

•   Biblia kelongaka beto kuvuanda na kumikitisa. (Masese 11:2) Beto ketadilaka ve mafua lokola diluaku ya “kumonisa” ti beto kele na bima mingi to beto kele bamvuama. (1 Yoane 2:16) Beto kebakaka ve bankubukulu ya kusala bafeti samu na kusepedisa bantu to kusumba baserkeyi ya ntalu mingi mpe kusumba bilele ya ntalu mingi samu na kukamuisa bantu.

•   Beto kesosaka ve kundimisa bantu yankaka bindimeli samu na mambu ya mafua na kingolo. Na diambu yango, beto kelandaka nsikudukusu yayi: “Mosimosi na beto kevutula yinua na Nzambi samu na yandi mosi.” (Baroma 14:12) Kasi, kana diluaku memonana, beto kesosaka kusasila bindimeli na beto na “kimpombo mpe luzitu ya mpinda.”​—1 Petro 3:15.

 Kisika: Kana dibuta ya muntu yango mebaka lukanu ya kudila mvumbi, yalenda salamina na kisika yina bakepona, na kifuani na Yinzo ya Kimfumu, na yinzo yina bakedidilaka mafua, na yinzo na bau mosi, na kisika bakeyokaka mafua, to na kisika bakezikaka mafua.

 Mambu yina bakesalaka: Bakesalaka diskur samu na kukindisa dibuta yina mefuila, mpe na diskur yango baketubilaka mambu yina Biblia metuba samu na lufua mpe kivuvu ya mfutumukunu. (Yoane 11:25; Baroma 5:12; 2 Petro 3:13) Diskur yango lenda sadisa beto samu beto bambuka na bikadulu ya mbote yina muntu yango vuandaka na yau, mpe mbala yankaka malongi ya kukindisa yina beto lenda baka na kifuani ya kukuikama ya muntu yango.​—2 Samwele 1:17-27.

 Beto lenda yimbila muyimbu mosi yina mesimbama na Masonukua. (Bakolose 3:16) Na nsuka beto kesalaka kisambu samu na kubomba bantu.​—Bafilipi 4:6, 7.

 Diskur kesalamaka ofele, bakekongolaka mpe ve minkayilu: Beto kelombaka mbongo ve na bankinzi na beto, yavuanda samu na kusala diskur ya kuzika mafua. Beto kelombaka mpe ve minkayilu na balukutakanu na beto.​—Matai 10:8.

 Bantu yina kekuiza: Kana bakedila mafua mpe bakesala diskur na Yinzo ya Kimfumu, ata bantu yina kele ve Bambangi ya Yehova lenda kuiza. Mutindu mosi na balukutakanu na beto nionso, muntu nionso lenda kuiza kuwa diskur yina kesalama kuna.

 Konso Mbangi ya Yehova kebakaka nzengolo yandi mosi na kutadila kikansasa na yandi yina melongua na Biblia. (1 Timote 1:19) Kasi, beto kekotaka ve na bankinzi ya mabundu yina kele ve na nguizani na malongi ya Biblia.​—2 Bakorinti 6:14-17.