Ee, Mbala mingi Bambangi ya Yehova kesadisaka bantu ntangu kisumbula mesalama. Beto kepesaka lusadusu ya kinsuni yina mebonga na Bambangi ya Yehova mpe na bantu yina kele ve Bambangi ya Yehova, na nguizani na ntumu ya Biblia yina kele na Bagalatia 6:10: “Beto sadila bantu nionso yina kele mbote, kasi mingimingi mpenza na bantu yina kele bampangi na beto na kati ya kiminu.” Beto kesalaka diaka ngolo samu na kupesa lusadusu ya makanisi mpe ya kimpeve na bantu yina mekutana na kisumbula yango, samu bakevuandaka na nsatu na yau na ntangu yango.—2 Bakorinti 1:3, 4.

 Na manima ya kisumbula mosi, bankulutu ya bimvuka yina kele na kisika yango kesosaka kubaka bansangu ya bampangi ya bimvuka na bau samu na kuzaba kana bakele na lutanunu mpe samu na kuzaba yinki kele nsatu na bau. Na manima, bankulutu kezabisaka biro ya filiale ya Bambangi ya Yehova mutindu mambu kele na kisika yango mpe yina bamesala deja samu na kupesa lusadusu.

 Kana bampangi ya bimvuka ya buala yango kele na makoki ve ya kupesa lusadusu na bampangi ya buala yina mekutana na kisumbula, Kimvuka ya Ntuadisi ya Bambangi ya Yehova kebakaka bankubukulu samu na kupesa lusadusu yina bampangi yango kele na yau nsatu. Baklisto ya siekle ya ntete pesanaka lusadusu ya mutindu yina na ntangu ya nsatu mosi ya nene. (1 Bakorinti 16:1-4) Biro ya filiale ya buala keponaka bampangi samu basala ekipi samu batuadisa kisalu ya kusadisa bantu yina mekutana na kisumbula. Bambangi ya Yehova yina mekatuka na bisika yankaka kekuizaka samu na kupesa ntangu mpe bima na bau samu na kusadisa.—Masese 17:17.

 Mosi ya mitindu yina makabu yina baketindaka na biro ya filiale ya Bambangi ya Yehova kesaduluaka kele samu na kusadisa bantu yina mekutana na bisumbula. (Misala 11:27-30; 2 Bakorinti 8:13-15) Bantu yina kekuizaka sadisa bantu yina mekutana na kisumbula kekukipesaka na nzola na bau mosi, na yau mbongo ya makabu kesaduluaka kaka samu na kusadisa bantu yina mekutana na kisumbula, kasi ve samu na bantu yina kena kusala kisalu ya kupesa lusadusu yango. Beto kesadilaka na mutindu ya mbote makabu nionso yina beto kebakaka.—2 Bakorinti 8:20.