Bambangi ya Yehova kesalaka nionso samu na kusangisa mabuta na bau mpe mabuta ya bafinangani na bau. Beto kezitisaka Nzambi, yina kele Mvangi ya dibuta. (Ebandeli 2:21-24; Baefese 3:14, 15) Na Biblia, Nzambi kelongaka bansikudukusu yina kesadisaka bantu na yinza mvimba bavuanda na dibuta yina kele na bumosi mpe na kiese.

 Beto kesalaka nionso yina beto lenda samu beto landa malongi ya Biblia yina kesadisaka beto samu beto kuma babakala, banketo, mpe bana ya mbote kuluta. (Masese 31:10-31; Baefese 5:22–6:4; 1 Timote 5:8) Malongi yina Biblia kepesaka kesadisaka ata mabuta yina kele na bantu ya mabundu ya kusuasana yavuanda na kiese. (1 Petro 3:1, 2) Kutu, beto tadila mambu yina bantu yina kele Bambangi ya Yehova ve tubaka, yina bankuelani na bau kumaka Bambangi ya Yehova:

•   Clauir, yina kevuandaka na Brésil tubaka: “Na bamvula 6 ya ntete ya ebandeli ya dikuela na munu na Ivete, beto vuandaka zonza mpambampamba mpe beto vuandaka fuema mingi. Kasi na manima, ntangu Ivete kumaka Mbangi ya Yehova, yandi kumaka na nzola mpe na ntima yinda mingi. Bansobolo yina yandi salaka vukisaka dikuela na beto.”

•   Agness, yina kevuandaka na Zambie tubaka: “Munu vuandaka telemina bakala na munu Chansa ntangu yandi bandaka kulonguka Biblia na Bambangi ya Yehova samu munu kanisaka ti bakepanzaka mabuta ya bantu. Na manima, munu kuizaka bakusa ti Biblia sadisaka dikuela na beto.”

 Na kisalu ya kusamuna, beto kemonisaka bafinangani na beto mutindu kusadila malongi ya Biblia lenda sadisa bau na:

•   Kupona nkuelani ya mbote

•   Kuzinga mbote na mvula ya ntete ya dikuela

•   Kuwizana mbote na babokilo

•   Kusadila mbongo na mayele

•   Kubika kuzonzazonza

•   Kulonguka mutindu ya kunlemvukila

•   Kuzaba kuyundula bana

 Ya kedika, na bantangu yankaka yakebimisaka matata. Na kifuani, na 1998 lapolo mosi ya institut de sondage tubaka ti nkuelani mosi kati na bankuelani 20 kutanaka na mikakatano ntangu nkuelani na yandi kumaka Mbangi ya Yehova.

 Yesu tubaka ti bantu yina kelandaka malongi na yandi kekutana mbala yankaka na kutelemina ya bantu ya dibuta na bau. (Matai 10:32-36) Muntu ya istuare na nkumbu ya Will Durant tubaka ti ntangu Empire ya Roma vuandaka yala, “bafundaka Baklisto ti bavuandaka panza mabuta ya bantu.” a Mpe bubu yayi, bakefundaka Bambangi ya Yehova yankaka mutindu yina. Kasi yazola monisa ti nkuelani yina kele Mbangi ya Yehova nde kebimisaka matata yango?

 Ntangu bafundaka Bambangi ya Yehova ti bakepanzaka mabuta ya bantu, Tribinale yina ketadilaka yinsua ya bantu (Cour européenne des droits de l’homme (CEDH) tubaka ti mbala mingi muntu yina mekuma Mbangi ya Yehova kekutanaka na matata na dibuta ntangu dibuta kemangaka “kundima mpe kuzitisa kimpuanza yina konso muntu ya dibuta kele na yau ya kupona dibundu na yandi.” Tribinale yango tubaka diaka ti: “Mambu yango kekuminaka mabuta nionso yina kevuandaka na bantu ya mabundu ya kusuasana; yakele mpe mutindu yina samu na Bambangi ya Yehova.” b Kasi, ata ntangu bakena kukutana na kutelemina samu na dibundu na bau, Bambangi ya Yehova kesalaka ngolo samu na kulanda dilongi yayi ya Biblia: “Beno vutusila muntu yimbi na yimbi ve. . . . Kana dikoki kele, kana yametadila kaka beno, beno vuanda na kiyenge na bantu nionso.”​—Baroma 12:17, 18.

 Bambangi ya Yehova kelandaka dilongi yayi ya Biblia ya kukuelana “kaka na nlonguki ya Mfumu,” yazola tuba kukuela kaka muntu yina beno kele kiminu mosi. (1 Bakorinti 7:39) Dilongi yango kele ya Biblia mpe yamebonga mpenza. Na kifuani, na mvula 2010 disolo mosi ya zulunalo (Journal of Marriage and Family) tubaka ti: “Bankuelani yina kele bantu ya dibundu mosi, kesalaka mambu ya mutindu mosi, mpe kele na bindimeli mosi” kevuandaka mbala mingi na nguizani ya mbote kuluta. c

 Kasi, Bambangi ya Yehova kekindisaka ve bantu ya dibundu na bau bakabuana na bankuelani na bau yina kele ve Bambangi ya Yehova. Biblia metuba: “Kana mpangi mosi ya bakala kele na nketo yina kele nkuikizi ve, mpe nketo yango mendima kuvuanda na yandi, yandi bika ve nketo yango; mpe kana nketo mosi kele na bakala yina kele nkuikizi ve, mpe bakala yango mendima kuvuanda na yandi, yandi bika ve bakala na yandi.” (1 Bakorinti 7:12, 13) Bambangi ya Yehova kezitisaka ntumu yango.