Beto kelandaka mpenza Biblia ntangu beto kesalaka nkinzi ya madia ya nkokila ya Mfumu, yina bakebokidilaka diaka “madia ya Mfumu,” madia ya nsuka, mpe Mbambukulu ya lufua ya Yesu. (1 Bakorinto 11:20; Bible en Kituba) Nzokande, malongi mingi mpe mambu mingi yina mabundu yankaka kesalaka samu na nkinzi yango kele ve na nguizani na yina Biblia metuba.

 Lukanu ya Madia ya nkokila ya Mfumu kele samu na kukanisa Yesu, kumonisa butondi samu na nkayilu yina yandi pesaka samu na beto. (Matayo 20:28; 1 Bakorinto 11:24) Nkinzi yango kele ve diambu yina bakebokidilaka sacrement, to nkinzi mosi ya mabundu yina kesalaka ti Nzambi ndima muntu to yandi nlemvukila masumu na yandi. a Biblia kelongaka ti Nzambi lenda nlemvukila masumu na beto kaka na nzila ya kundimina Yesu, kasi ve na nzila ya nkinzi mosi ya dibundu.​—Baroma 3:​25; 1 Yoane 2:​1, 2.

 Yesu pesaka banlonguki na yandi ntumu basalaka nkinzi ya Madia ya nkokila ya Mfumu, kasi yandi tubilaka bau ve mbala yikua bafueti salaka yau. (Luka 22:19) Bantu yankaka kekanisaka ti bafueti sala yau konso ngonda, nzokande bantu yankaka kesalaka yau konso sabala, konso kilumbu, mbala mingi na kilumbu, to konso ntangu yina muntu mesepela kusala yau. b Kasi, tala mua mambu yina beto fueti tadila.

 Yesu bandisaka nkinzi ya Madia ya nkokila ya Mfumu na dati yina Bayuda vuandaka sala feti ya Paki. (Matayo 26:​1, 2) Yavuandaka kaka samu na mpamba ve. Biblia kefuanikisaka nkayilu ya Yesu na muana dimeme yina bavuandaka kufua na Paki. (1 Bakorinto 5:​7, 8) Bavuandaka sala Paki mbala mosi na mvula. (Kubasika 12:​1-6; Levi 23:5) Mutindu mosi, Baklisto ya ntete vuandaka sala Mbambukulu ya lufua ya Yesu mbala mosi na mvula, c mpe Bambangi ya Yehova kelandaka kaka kifuani yango ya Biblia.

 Kifuani yango ya Yesu kena kusadisa beto diaka beto zaba kaka ve mbala yikua kusala Mbambukulu, kasi mpe dati mpe wola ya kusala yau. Yandi bandisaka nkinzi yango na manima ya kuleka ya muini na kilumbu ya 14 Nisana na mvula 33 N.B., na kutadila kalandriye ya Bayuda na ntangu yina. (Matayo 26:​18-20, 26) Beto ketatamanaka kusala Mbambukulu na dati yango konso mvula, na kulandaka kifuani ya Baklisto ya siekle ya ntete. d

 Atako 14 Nisana ya mvula 33 N.B. vuandaka kilumbu ya vendredi, aniversere ya dati yango lenda kubua mpe kilumbu yankaka ya sabala ya konso mvula. Beto kesadilaka mayele yina bantu ya ntangu ya Yesu vuandaka sadila samu na kuzaba kana dati ya 14 Nisana kekubua yinki kilumbu, na kisika ya kulanda kalandriye ya Bayuda ya Bubu yayi. e

 Ntangu Yesu bandaka nkinzi yango, yandi sadilaka dimpa yina mekondua levire mpe vinu ya mbuaki yina bikanaka na feti ya Paki. (Matayo 26:26-​28) Na kulandaka kifuani na yandi, beto kesadilaka dimpa yina mekondua levire to bima yankaka mpe vinu ya mbuaki yina babuela ata kima mosi ve. Kasi beto kesadilaka ve maza ya mbuma ya vinu yina bamekatuka kubuka to vinu yina bamesangisa na bambuma yankaka ya sukadi.

 Mabundu yankaka kesadilaka dimpa yina bametulaka levire, kasi na Biblia, mbala mingi levire kevuandaka kidimbu ya disumu to kubola. (Luka 12:1; 1 Bakorinto 5:​6-8; Bagalatia 5:​7-9) Yau yina, kaka dimpa yina mekondua levire mpe bima yankaka nde fueti vuanda kidimbu ya nzutu ya Klisto yina mekondua disumu. (1 Piere 2:​22) Diambu yankaka yina Biblia kendimaka ve kele kusadila vinu yina bamesangisa na bambuma yankaka ya sukadi. Mabundu yankaka kesalaka mutindu yina samu bakemangaka kunua malavu atako Biblia pekisa yau ve.​—1 Timoteo 5:​23.

 Dimpa mekondua levire mpe vinu ya mbuaki ya Mbambukulu kele kaka bidimbu ya nzutu mpe menga ya Klisto. Yasobaka ve na mutindu ya kimangu to yasanganaka ve na nzutu mpe menga mpenza ya Yesu, mutindu bantu yankaka kekanisaka yau. Beto tadila baverse yina mendimisa diambu yango.

•   Kana Yesu tubilaka banlonguki na yandi bakunua menga na yandi, yandi zolaka tinda bau na kubuka nsiku ya Nzambi yina mepekisa kudia menga. (Kuyantika 9:4; Bisalu 15:28, 29) Yalendaka salama ve samu Yesu lendaka tinda bantu ata fioti ve na kubuka nsiku ya Nzambi yina metuba ti menga kele nlongo.​—Yoane 8:​28, 29.

•   Kana bantumua kunuaka mpenza menga ya Yesu, yandi zolaka tuba ve ti menga na yandi ‘ketiamuka,’ samu na kumonisa ti nkayilu na yandi pesamaka ntete ve.​—Matayo 26:28.

•   Yesu pesaka nkayilu ‘mbala mosi samu na mvimbamvimba.’ (Baebreo 9:​25, 26) Kasi, kana dimpa mpe vinu sobaka mpenza samu na kukuma nzutu mpe menga ya Yesu na nkinzi ya Madia ya nkokila ya Mfumu, yazolaka monana lokola bantu yina kekudiaka dimpa mpe kekunuaka vinu yango kena kuvutukila nkayilu yango mbala na mbala.

•   Yesu tubaka: ‘Beno tatamana kusala yau samu na kubambukila munu,’ kasi ve samu na “nkayilu na munu.”​—1 Bakorinto 11:24.

 Bantu yina kendimaka ti dimpa kesobaka mpenza na nzutu ya Yesu mpe vinu na menga ya Yesu, bakebakaka makanisi yango na baverse yankaka ya Biblia. Na kifuani, na bambangudulu mingi ya Biblia bakebangulaka bampova ya Yesu mutindu yayi: “Yayi kele menga na munu.” (Matayo 26:28) Kasi, bampova yango ya Yesu lenda bangulua diaka na: “Yayi kena kumonisa menga na munu,” “Yayi kele kifuani ya menga na munu,” to “Yayi kele kidimbu ya menga na munu.” f Yesu sadilaka bampova ya kifuani mutindu yandi mesanaka kusala na malongi na yandi.​—Matayo 13:34, 35.

 Ntangu Bambangi ya Yehova kesalaka nkinzi ya Madia ya nkokila ya Mfumu, kaka bantu fioti kekudiaka dimpa mpe kekunuaka vinu. Samu na yinki?

 Yesu salaka ‘luwawanu ya yimpa’ na nzila ya menga na yandi yina tiamukaka, yau nde bakaka kisika ya luwawanu yina Yehova Nzambi salaka na dikanda ya Yisaele ya ntama. (Baebreo 8:​10-​13) Bantu yina kele na kati ya luwawanu ya yimpa nde kekudiaka dimpa mpe kekunuaka vinu ya Mbambukulu. Yau mesangisa kaka ‘bantu yina [Nzambi] mebokilaka’ na mutindu mosi ya spesiale, kasi Baklisto nionso ve. (Baebreo 9:​15; Luka 22:20) Bantu yango keyala kintuadi na Klisto na dizulu, mpe Biblia metuba ti kaka bantu 144 000 mebaka diluaku yango.​—Luka 22:28-​30; Kusonga 5:​9, 10; 14:​1, 3.

 Na lusuasanu na “kimvuka ya fioti” ya bantu yina bamebokila samu na kuyala kintuadi na Klisto, mingi kati na beto kele na kivuvu ya kuvuanda na kati ya “kimvuka . . . ya nene” ya bantu yina kebaka luzingu ya mvula na mvula na ntoto. (Luka 12:32; Kusonga 7:​9, 10) Atako beto bantu yina kele na kivuvu ya kuzinga na ntoto beto kekudiaka ve dimpa mpe beto kekunuaka ve vinu ya Mbambukulu, beto kekutakanaka samu na kumonisa butondi samu na nkayilu yina Yesu pesaka samu na beto.​—1 Yoane 2:2.