Mbongo yina beto kesadilaka bisalu na beto na yinza ya mvimba kekatukaka ntetentete na makabu yina Bambangi ya Yehova kepesaka na luzolo na bau mosi. a Na bisika na beto ya balukutakanu yakevuandaka na bakesi ya makabu, kasi bantu lenda pesa diaka makabu na mutindu yankaka; bamemonisa yau na paje yina ketubilaka Makabu. Na paje yango beto kekuta mitindu ya kupesila makabu yina muntu lenda pona, kupesa makabu samu na bisalu na beto na yinza ya mvimba, samu na bisalu ya kimvuka, to samu na nionso zole.

 Bakelombaka ve Bambangi ya Yehova dîme to mua ntalu mosi ya mbongo na kutadila mbongo yina bakebakaka. (2 Bakorinti 9:7) Beto kekongolaka ve mbongo na balukutakanu na beto mpe beto kelombaka ve bantu mbongo tekila bakota na balukutakanu na beto, diaka bantu yina kepesaka bantu mbotama, bantu yina kesalaka badiskur kana muntu mekufua to ya makuela, yavuanda mpe bantu yina kesalaka bisalu yankaka, bakefutaka bau mbongo ve. Beto kesalaka mumbongo ve samu na kubaka mbongo mingi, to bansaka ya mbongo, mpe beto kelombaka ve muntu na kingolo yandi pesa makabu. Beto ketulaka ve bankumbu ya bantu yina metula makabu na kisika yina muntu nionso lenda mona. (Matai 6:2-4) Basite ya Internet mpe mikanda na beto kevuandaka ve na bapiblisite.

 Bimvuka nionso ya Bambangi ya Yehova kesalaka lapolo ya mbongo yina bamesadila konso ngonda na balukutakanu yina bakesalaka, yina muntu nionso lenda kuiza. Baketadilaka mbala na mbala lapolo ya mbongo ya kimvuka samu na kukindimisa ti makabu yina bampangi kepesaka kena kusadulua na mutindu mebonga.—2 Bakorinti 8:20, 21.

•   Bakesi ya makabu: Nge lenda pesa makabu ya mbongo na nzila ya chèque to kutula mbongo na bakesi ya makabu yina kevuandaka na yinzo ya Kimfumu, Balukutakanu ya nene, to na bisika yankaka yina beto kesalaka nsambudulu.

•   Kupesa makabu na nzila ya Internet: Na babuala mingi, nge lenda sadila paje “Makabu samu na Bambangi ya Yehova” samu na kupesa makabu na nzila ya karte ya kredi, karte ya banki, kutinda mbongo na nzila ya banki, mpe mutindu yankaka ya kupesa makabu na nzila ya Internet. b Bambangi ya Yehova yankaka keponaka ‘kulunda mua kima pembeni’ konso sabala samu na kupesa makabu na kutadila mutindu bamebongisaka samu na kupesa yau.—1 Bakorinti 16:2.

•   Kupesa makabu yina mebongisamaka: Mutindu yankaka ya kupesa makabu kelombaka kubongisa yau tekila to kubaka lusadusu ya avoka to notaire. Kubongisa mambu mutindu yina lenda sadisa samu nge futa mpaku mingi ve na buala na beno. Bantu mingi mebakaka mambote ntangu bakuizaka zaba mbote mambu yina metadila mbongo yina muntu lenda pesa na nkubukulu yina kesadisaka bantu ntangu yandi kele ntete na luzingu to yina nkubukulu lenda sadila na manima ya lufua na yandi. Beto melomba nge nge solola na biro ya Bambangi ya Yehova na kisika yina nge kele samu na mambu mingi yina metadila kupesa makabu na:

  •   konti ya banki

  •   mbongo ya asiransi mpe ya pansion

  •   kupesa yinzo to lupangu

  •   yinsua ya kubaka mbongo

  •   testama

 Samu na kuzaba mambu yankaka samu na diambu metadila kupesa makabu na kisika yina nge kele, tala paje “Makabu samu na Bambangi ya Yehova.”