Bambangi ya Yehova kezitisaka bamfumu ya Leta mpe bidimbu ya buala. Beto kendimaka ti bantu yankaka lenda pona kupesa drapo losako, to kuyimbila muyimbu ya buala.

 Kasi beto Bambangi ya Yehova, beto keponaka kumanga kupesa maboko na bankinzi ya mutindu yina samu yakele ve na nguizani na mambu yina Biblia kelongaka. Beto kesepelaka ntangu bantu kezitisaka bindimeli na beto mutindu kaka beto mpe beto kezitisaka bindimeli na bau.

Na disolo yayi, beto ketubila:

•  Yinki bansikudukusu ya Biblia yina memonisa yau?

•  Yinki beto lenda sala kana nsiku mosi ya buala metuba ti beto fueti sangana na mambu ya mutindu yina?

•  Bambangi ya Yehova kepesaka maboko na mambu yina metadila luzingu ya bantu to na mambu ya politiki?

 Bansikudukusu zole ya mfunu ya Biblia kevuandaka na bupusi na banzengolo yina beto kebakaka:

•   Beto fueti sambila kaka Nzambi. Biblia metuba: “Nge fueti sambila nde Yehova Nzambi na nge, mpe kaka yandi mosi nde nge fueti sadila kisalu ya nlongo.” (Luka 4:8) Muyimbu ya buala kevuandaka na bampova yina mbala yankaka kekindisaka ntete nzola ya buala kuluta kima yankaka nionso. Na yau Bambangi ya Yehova kemonaka ti yakele yimbi samu na bau kupesa maboko na bankinzi ya mutindu yina.

   Bambangi ya Yehova kemonaka ti kupesa drapo losako kele kusala nsambudulu, to kusambila biteke—mambu yina Biblia kepekisaka. (1 Bakorinti 10:14) Bantu yankaka ya istuare mezaba ti drapo ya buala kevuandaka mpenza kidimbu ya nsambudulu. Muntu mosi ya istuare na nkumbu ya Carlton J. H. Hayes a sonikaka: “Nzola ya buala kele lokola dibundu yina kidimbu na yau ya nsambudulu kele drapo.” Nsoniki mosi ya mikanda na nkumbu ya Daniel P. Mannix, sonikaka mambu yayi samu na Baklisto ya siekle ya ntete: “Baklisto vuandaka manga . . . Kupesa bankayilu na mpeve yina vuandaka tanina amperere ya [Roma]—diambu yina beto lenda fuanikisa bubu yayi na kumanga kupesa drapo losako.” b

  Atako Bambangi ya Yehova kepesaka ve drapo losako, kasi bakepasunaka yau ve, bakeyoka yau ve, mpe bakemonisaka ve ti drapo to bidimbu yankaka ya buala kele na mfunu ve.

•   Na meso ya Nzambi bantu nionso kele mutindu mosi. (Misala 10:34, 35) Biblia metuba ti Nzambi “na nzila ya muntu mosi bimisaka makanda nionso ya bantu.” (Misala 17:26) Samu na mfunu yango, Bambangi ya Yehova kendimaka ti yakele yimbi kukumisa dikanda mosi ya bantu to kutadila buala mosi lokola yameluta babuala yankaka. Beto kepesaka bantu nionso lokumu, yavuanda yinki kisika bamekatukaka to yinki kisika bakevuandaka.​—1 Petro 2:17.

 Bambangi ya Yehova keteleminaka ve bamfumu ya Leta. Beto kendimaka ti baguvernema kele “nkubukulu ya Nzambi”, yandi nde mebika bau bavuanda. (Baroma 13:1-7) Beto kendimaka diaka ti Baklisto fueti zitisa bamfumu ya Leta.​—Luka 20:25.

 Bosi kana nsiku mosi ya Leta melomba beto sala diambu mosi yina nsiku ya Nzambi mepekisa? Na bantangu yankaka, yalenda salama ti beto lomba na bamfumu ya Leta batadila diaka nsiku yango mbotembote kana balenda bongisa yau. c Kana dikoki ya kusoba yau kele ve, Bambangi ya Yehova keponaka na luzitu nionso “kuzitisa Nzambi samu yandi kele mfumu na kisika ya kuzitisa bantu.”​—Misala 5:29.

 Ve. Bambangi ya Yehova keponaka ve ndambu mosi na mambu metadila luzingu ya bantu to na mambu ya politiki. Ntangu beto kemangaka kusala ndefi ya kukota na mambu ya politiki, kupesa drapo losako to kuyimbila muyimbu ya buala, yakezolaka monisa ve ti beto kele bantu ya politiki. Kasi samu na diambu yina metadila bankinzi yango, beto kekangamaka nde na bindimeli na beto yina mesimbama na malongi ya Biblia.