Na bilumbu na beto, disolo ya Bambangi ya Yehova bandaka na nsuka ya bamvula 1800. Na ntangu yango, grupe mosi ya fioti yina vuandaka zinga pene ya Pittsburgh, na kizunga ya Pennsylvanie, na États-Unis, kukipesaka samu na kulonguka mambu yina kele na kati ya Biblia. Bavuandaka fuanikisa mambu yina mabundu vuandaka longa na mambu yina Biblia vuandaka longa mpenza. Babandaka kubimisa mambu yina bavuandaka longuka na mikanda, na bazulunalo, mpe na zulunalo yina mezabana bubu yayi na nkumbu ya Yinzo’a zulu ya Nkengi—Kesamunaka Kimfumu ya Yehova.

 Charles Taze Russell vuandaka na kati ya bantu yina kukipesaka samu na kulonguka Biblia. Atako Russell nde vuandaka tuadisa kisalu ya kulonga Biblia na ntangu yina mpe yandi nde bimisaka Yinzo’a zulu ya Nkengi samu na mbala ya ntete, yandi bandisaka dibundu ya yimpa ve. Lukanu ya Russell mpe bankundi na yandi Banlonguki ya Biblia vuandaka kumuangisa malongi ya Yesu Klisto mpe kulanda mambu yina vuandaka salama na kimvuka ya Buklisto ya siekle ya ntete. Lokola Yesu nde bandisaka kimvuka ya Buklisto, beto ketadilaka yandi nde lokola muntu yina bandisaka nkubukulu na beto.—Bakolose 1:18-20.