Lokola Bambangi ya Yehova kezolaka Nzambi mpe bafinangani na bau, bakesepelaka kuzabisa muntu nionso nsangu ya Biblia, ata mpe na bantu yina tubaka ti “Munu kesepelaka ve na malongi na beno.” (Matai 22:37-39) Nzola samu na Nzambi ketindaka beto beto zitisa ntumu ya Muana na yandi ya “kupesa kimbangi mbotembote.” (Misala 10:42; 1 Yoane 5:3) Samu na kusala yau, beto kevutukilaka bantu mbala na mbala samu na kunatina bau nsangu ya Nzambi, kaka mutindu bansamuni ya ntama vuandaka sala. (Yeremia 25:4) Lokola beto kezolaka bafinangani na beto, beto kesosaka kusamunina bantu nionso “nsangu ya mbote ya Kimfumu” yina kevukisaka baluzingu, yavuanda na bantu yina mbala ya ntete sepelaka ve na malongi na beto.​—Matai 24:14.

 Mbala mingi beto kekutaka bantu yina mesepela ntangu beto kevutukaka na bayinzo ya bantu yina sepelaka ve mbala lutaka. Beto tadila bamfunu tatu:

•   Bantu kekatukaka mpe bakekuendaka bisika yankaka.

•   Bantu yankaka na yinzo yango kesepelaka na nsangu na beto.

•   Bantu kesobaka. Mambu ya yinza to mambu yina muntu mekutana na yau ketindaka bantu yankaka ‘bazaba nsatu na bau ya kimpeve’ mpe basepela na nsangu ya Biblia. (Matai 5:3) Ata bantu yina teleminaka beto lenda balula ntima mutindu ntumua Paulo salaka.​—1 Timote 1:13.

 Kasi, beto ketindikaka ve bantu bandima nsangu na beto na kingolo. (1 Petro 3:15) Beto mezaba ti konso muntu fueti baka nzengolo na yandi na diambu metadila nsambudulu.​—Kolimbola Mibeko 30:19, 20.