Samu na yinki Bambangi ya Yehova kekuendaka ve na mvita?

KUWA NA

Bambangi ya Yehova kekuendaka ve na mvita samu na bamfunu yayi melenda:

Beto kezitisaka Yehova. Biblia metuba ti bisadi ya Yehova fueti “kumisa mipanga na bau bima yina baketimuninaka ntoto” mpe bafueti longuka diaka ve mvita.—Yisaya 2:4.
Beto kezitisaka Yesu. Yesu tubilaka ntumua Petelo: “Vutula mopanga na nge na kisika na yau, samu bantu nionso yina kenuanaka na mopanga kekufua na mopanga.” (Matai 26:52) Na yau, Yesu monisaka ti banlonguki na yandi lenda simba ve minduki ya mvita.

Banlonguki ya Yesu kezitisaka ntumu yina yandi pesaka bau ti bafueti “vuanda bantu ya yinza ve” yazola monisa ti bafueti kota ve na mambu ya politiki. (Yoane 17:16) Baketeleminaka ve kisalu yina basoda kesalaka to bakepekisaka ve bantu yina mepona kusala kisalu ya soda.
Beto kezolaka bantu. Yesu pesaka banlonguki na yandi ntumu ti ‘bazolanaka.’ (Yoane 13:34, 35) Na mutindu yango, bakekuma kimvuka ya bampangi na yinza ya mvimba yina ata kilumbu mosi ve mosi kati na bau kekuenda na mvita samu na kunuanisa mpangi na yandi.—1 Yoane 3:10-12.
Beto kelandaka kifuani ya Baklisto ya siekle ya ntete. Mukanda mosi (Encyclopedia of Religion and War) metuba ti: “Banlonguki ya Yesu ya siekle ya ntete vuandaka manga bamvita mpe kisalu ya soda,” samu bavuandaka mona ti mambu yango “kele na nguizani ve na nzola yina Yesu monisaka mpe na ntumu yina yandi pesaka ti muntu fueti zola bambeni na yandi.” Mutindu mosi mpe, Peter Meinhold muntu mosi ya Teoloji na Allemagne, tubaka samu na banlonguki ya Yesu ti: “Muntu mosi ve vuandaka na dikoki ya kuvuanda Muklisto mpe kuvuanda soda.”

Beto kevuandaka bana buala ya mbote

Bambangi ya Yehova kevuandaka bana buala ya mbote mpe bakebebisaka ve kiyenge na babuala yina bakezingaka. Bakezitisaka bamfumu ya Leta, na nguizani na bantumu ya Biblia yayi melanda:

“Muntu nionso fueti zitisa bamfumu ya leta.”—Baroma 13:1, Bible na lingala ya lelo oyo.
“Na yau, beno vutula bima ya Kaisala na Kaisala, kasi bima ya Nzambi na Nzambi.”—Matai 22:21.

Na yau, beto kezitisaka minsiku ya Leta, beto kefutaka mpaku, mpe beto kesalaka mambu yina guvernema metuba ti yafueti salama samu na mambote ya bantu nionso.