Makanisi ya bantu: Mfunu yina Bambangi ya Yehova kesalaka ve feti ya Paki kele samu bakele ve Baklisto.

 Diambu ya kedika: Beto kendimaka ti Yesu Klisto kele Mvuluzi na beto, mpe beto kesalaka ngolo samu ‘beto landa bitambi na yandi mbotembote.’—1 Petro 2:21; Luka 2:11.

Makanisi ya bantu: Beno kendimaka ve ti Yesu futumukaka.

 Diambu ya kedika: Beto kendimaka ti Yesu futumukaka; beto mezaba ti mfutumukunu nde mesimba kiminu ya Baklisto nionso mpe beto kemonisaka yau na kisalu na beto ya kusamuna.—1 Bakorinti 15:3, 4, 12-15.

Makanisi ya bantu: Beno kemangaka ti bana na beno sepela na nkinzi ya Paki.

 Diambu ya kedika: Beto kezolaka bana na beto—beto kesalaka nionso samu na kulonga bau mpe kusadisa bau bavuanda na kiese.—Tito 2:4.

•   Nkinzi ya Paki katukaka ve na Biblia.

•   Yesu tubaka ti beto kanisaka lufua na yandi, kasi mfutumukunu na yandi ve. Beto kekanisaka lufua ya Yesu konso mvula na dati yina mewizana na kalandriye ya ntama (calendrier lunaire) mutindu Biblia memonisa yau.—Luka 22:19, 20.

•   Beto kendimaka ve ti Nzambi kendimaka Paki, samu bikadulu yango katukaka na bankinzi ya ntama ya mambu metadila kubuta. Yau kesalaka ti Nzambi bika ndima nkinzi yango ya Paki. Nzambi kelombaka ti beto ‘kangama kaka na yandi,’ mpe yandi kesepelaka ve kana bantu kena kusambila yandi na mutindu yina yandi kendimaka ve.—Kobima 20:5; 1 Bakonzi 18:21.

 Beto kendimaka ti lukanu yina beto mebakaka ya kusala ve nkinzi ya Paki mekatukaka na Biblia, yakekindisaka beto kusadila “nduenga mpe dikoki ya kukanisa” na kisika ya kulanda mimeseno ya bantu. (Masese 3:21; Matai 15:3) Kana diluaku memonana beto kezabisaka bantu yankaka mambu yina beto kendiminaka na diambu metadila nkinzi ya Paki, beto kezitisaka diaka yinsua ya konso muntu ya kupona mambu yina yandi kesala.—1 Petro 3:15