Watch Tower Bible and Tract Society of Pennsylvania kele nkubukulu ya mumbongo ve, yasalamaka na 1884 na kulanda bansiku ya Commonwealth of Pennsylvania, na États-Unis. Yakele nkubukulu yina Bambangi ya Yehova kesadilaka samu na kutuadisa kisalu na bau na yinza ya mvimba; na kifuani kisalu ya kubimisa Babiblia mpe mikanda yankaka yina kesasilaka Biblia.

 Mukanda yina metubila lukanu ya nkubukulu yango metuba ti nkubukulu yango kele na balukanu ya “nsambudulu, ya kulonga, mpe ya kusadisa bantu,” mingimingi na nzila ya “kulonga mpe kusamuna baevanjile ya Kimfumu ya Nzambi na yinsi ya luyalu ya Klisto Yesu.” Muntu lenda kota na nkubukulu yango kaka kana bamebokidisa yandi, mpe yaketadilaka ve makabu yikua muntu kepesaka. Bantu yina kele na nkubukulu yango mpe bantu yina ketuadisaka yau kepesaka maboko na bampangi ya Kimvuka ya Ntuadisi ya Bambangi ya Yehova.

 Katula Watch Tower Bible and Tract Society of Pennsylvania, Bambangi ya Yehova kesadilaka diaka bankubukulu mingi yina mendimama na Leta na babuala mutindu na mutindu. Na nkumbu ya bankubukulu yango yankaka nge kekuta mpova lokola “Watch Tower,” “Watchtower,” to bakebangulaka bampova yango.

 Banda bamesalaka yau, bankubukulu yango yina mendimama na Leta kesadisaka beto samu beto kokisa mambu mingi mpenza. Na kifuani:

•   Kusonika mpe kubimisa mikanda. Beto mebimisaka Babiblia kana 220 milion mpe mikanda yina kesasilaka Biblia kana 40 miliare. Beto kebimisaka mikanda na bandinga kuluta 900. Site na beto jw.org kesadisaka bantu na kutanga Biblia ofele na nzila ya Internet na bandinga kuluta 160 mpe kubaka bamvutu na biuvu ya Biblia lokola, “Bokonzi ya Nzambe ezali nini?”

•   Kulonga. Beto kele na baekole mutindu na mutindu yina kelongaka bantu Biblia. Na kifuani, banda mvula 1943, Bambangi ya Yehova kana 9 000 bakaka formasion ya mpinda na ekole ya Watchtower Bible School of Gilead, yina pesaka bau nzila ya kusala lokola bamisionere to samu na kusiamisa kisalu na beto na yinza ya mvimba. Mpe konso sabala, Bamilion ya bantu, ata bayina kele ve Bambangi ya Yehova, kebakaka formasion na balukutakanu yina kesalamaka na konso bimvuka na beto. Beto kelongaka diaka bantu samu bazaba kutanga mpe kusonika mpe beto mebimisaka mukanda mosi na bandinga 120 yina kesadisaka samu na diambu yango.

•   Kusadisa. Beto kepesaka diaka lusadusu na bantu yina mekutana na mambu ya mpasi yina bantu kebimisaka, na kifuani kuyinana yina salaka bakufua grupe mosi ya bantu (génocide) yina salamaka na Rwanda na 1994; to bisumbula yina kebimaka yau mosi, na kifuani kuningana ya ntoto ya ngolo yina salamaka na Haïti na 2010.

 Atako beto kesalaka mambu na beto mingi na nzila ya bankubukulu na beto yina mendimama na Leta, kisalu na beto simbama ve na bankubukulu yango. Konso Muklisto kele na kiyekua ya kukokisa kisalu yina Nzambi mepesa yandi: kusamuna mpe kulonga nsangu ya mbote. (Matai 24:14; 28:19, 20) Beto kendimaka ti Nzambi nde mesimba kisalu na beto mpe yandi ketatamana kuvuanda muntu yina “kekudisaka.”—1 Bakorinti 3:6, 7.