Yinki munu lenda sala samu munu kuma Mbangi ya Yehova?
Yesu monisaka mambu yina muntu fueti sala samu yandi kuma Mbangi ya Yehova na Matai 28:19, 20. Baverse yango memonisa puelele mambu yina nge fueti sala samu nge kuma nlonguki ya Klisto. Yakelombaka kutuba, to kusamuna mambu ya Yehova.
Diambu ya ntete: Longuka mambu yina Biblia kelongaka. Yesu tubilaka banlonguki na yandi ti ‘bakumisa bantu banlonguki . . . , balonga bau.’ (Matai 28:19, 20) Mpova yina bamebangula na “nlonguki” zola monisa “muntu yina kena kulonguka.” Biblia, mingimingi malongi ya Yesu yina kele na kati ya Biblia, kele na mambu mingi yina lenda sadisa nge samu nge vuanda na luzingu ya mbote mpe ya kiese. (2 Timote 3:16, 17) Beto kele na kiese ya kusadisa nge samu nge zaba mambu yina Biblia kelongaka na nzila ya programe na beto ya ndongokolo ya Biblia ya ofele.—Matai 10:7, 8; 1 Batesaloniki 2:13.
Diambu ya zole: Sadila mambu yina nge kena kulonguka. Yesu tubaka ti bantu yina kena kulonguka fueti “zitisa mambu nionso yina [yandi] mepesa bau ntumu.” (Matai 28:20) Yazola monisa ti, ntangu nge kena kulonguka kusuka kaka ve na kubaka nzayilu, kasi nzayilu yango fueti tinda nge nge balula mpenza makanisi mpe bikadulu na nge. (Misala 10:42; Baefese 4:22-29; Baebre 10:24, 25) Bantu yina kezitisaka bantumu ya Yesu kebakaka nzengolo bau mosi ya kulanda yandi mpe bakepesaka luzingu na bau na Yehova Nzambi.—Matai 16:24.
Diambu ya tatu: Baka mbotama. (Matai 28:19) Na Biblia, bamekokanisa mbotama na kuzika muntu. (Fuanikisa na Baroma 6:2-4.) Yakele kidimbu ya kufua na kutadila luzingu na nge ya ntama mpe ya kubanda luzingu ya yimpa. Mbotama na nge kemonisa ti nge mesala mambu zole ya ntete yina Yesu tubilaka mpe nge kena kulomba Nzambi kumisa kikansasa na nge ya kuvedila.—Baebreo 9:14; 1 Petro 3:21.
Yinki mutindu munu kezaba ti munu kele ya kubongama samu na kubaka mbotama?
Zabisa bankulutu ya kimvuka na beno. Bakesolola na nge samu na kuzaba kana nge mekanga mfunu ya mbotama, kana nge kena kusadila mambu yina nge longukaka, mpe kana nge mekukipesa na Yehova na nzola na nge mosi.—Misala 20:28; 1 Petro 5:1-3.
Bana ya Bambangi ya Yehova diaka fueti kokisa mambu yina kelombakama samu na kubaka mbotama tekila babaka yau?
Ee. Beto keyundulaka bana na beto “na bantumu mpe na banduengoso ya Yehova,” mutindu kaka Biblia melomba yau. (Baefese 6:4) Kasi, ntangu bakena kuyunduka, bau mosi fueti baka nzengolo ya kulonguka, ya kundima, mpe ya kusadila mambu yina Biblia kelongaka tekila bandima bau babaka mbotama. (Baroma 12:2) Kutu, konso muntu fueti pona yina yandi mezola na diambu metadila nsambudulu.—Baroma 14:12; Bagalatia 6:5.
Tala diaka...
MAMBU YINA METADILA BETO
Yinki mutindu ndongokolo ya Biblia kesalaminaka?
Na yinza ya mvimba, Bambangi ya Yehova mezabana samu na manaka na bau ya kulonguka Biblia na bantu na bayinzo. Tala mutindu yau kesalaminaka.
BIUVU YINA BANTU KEYUVUSAKA MINGI
Kana Bambangi ya Yehova melonguka na munu Biblia, yakelomba munu kuma kaka Mbangi ya Yehova?
Bambangi ya Yehova kelongukaka Biblia ofele kintuadi na bamilion ya bantu na yinza ya mvimpa. Kasi, kana nge kena kulonguka na beto, yakelomba nge kuma kaka Mbangi ya Yehova?
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.