Beto kesadilaka makabu na beto na mambu ya nsambudulu mpe samu na kusadisa bantu yina mekutana na mambu ya mpasi. Beto kesalaka mambu yango samu na kukokisa kiyekua na beto ya ntetentete: kusadisa bantu bakuma banlonguki ya Yesu Klisto.—Matai 28:19, 20.

 Beto kesadilaka ata fioti ve makabu na beto samu na kukumisa muntu mosi plina mvuama. Beto kefutaka ve bantu yina ketuadisaka beto to bisadi yankaka, mpe Bambangi ya Yehova kefutamaka ve samu na kukuenda samuna yinzo na yinzo. Bantu yina kesalaka na babiro ya filiale na beto mpe biro ya nene ya Bambangi ya Yehova, yavuanda mpe bantu yina ketuadisaka bisalu ya Bambangi ya Yehova na yinza ya mvimba kefutamaka ve.

•   Kubimisa mikanda: Konso mvula, beto kebangulaka Biblia mpe mikanda yina kesasilaka Biblia, beto kebimisaka yau, beto ketindaka yau na bisika mutindu na mutindu, mpe beto kekabudilaka bantu bamilion ya Babiblia mpe ya mikanda yango ofele. Mutindu mosi mpe, Mikanda yango kele ofele na site na beto ya Internet jw.org mpe na aplikasion na beto JW Library.

•   Kutunga bisika ya nsambudulu mpe kutanina yau: Beto ketungaka mpe beto ketaninaka bisika na beto ya nsambudulu na yinza ya mvimba samu bampangi vuanda na kisika ya mbote ya kukutakanaka mpe kusambila Nzambi. Beto kesalaka mpe mutindu yina samu na babiro ya filiale mpe bayinzo ya mbangudulu. Bisalu yango kesalamaka mingimingi na bantu yina mekukipesaka na nzola na bau mosi.

•   Kutuadisa mambu: Bisalu yina kesalamaka na biro ya nene ya Bambangi ya Yehova, na babiro na beto ya filiale, na babiro na beto ya mbangudulu, buela diaka kisalu ya bampangi yina kesalaka bavuayaje samu na kukindisa bampangi yankaka, kesalamaka na nzila ya makabu yina bampangi kepesaka na nzola na bau mosi.

•   Kusamuna: Bambangi ya Yehova kefutamaka ve samu na kisalu na bau ya kusamuna.” (2 Bakorinti 2:17) Kasi, kaka mutindu yavuandaka salama na siekle ya ntete, yakele na bampangi yina meponamaka, yina mebakaka formasion mpe yina mekukipesaka mingi na kisalu ya kusamuna. Nkubukulu na beto kepesaka bampangi yango bisika ya kuvuanda mpe bima yankaka yina bakele na yau nsatu.—Bafilipi 4:16, 17; 1 Timote 5:17, 18.

•   Malongi: Mbongo yina beto kebimisaka samu na balukutakanu ya fioti mpe ya nene kekatukaka na makabu. Beto kebimisaka diaka malongi ya Biblia yina muntu lenda kuwa kaka na makutu mpe bavideo. Bampangi yina ketuadisaka bimvuka na beto mpe bampangi yina mekukipesaka mingi na kisalu ya kusamuna kebakaka formasion na bakalasi samu bakokisa mbote biyekua na bau.

•   Kusadisa bampangi yina mekutana na kisumbula: Beto kepesaka madia, maza, mpe bisika ya kuvuanda na bampangi yina mekutana na kisumbula yina kebimaka yau mosi mpe yina bantu kebimisaka. Beto kesadisaka ve kaka “bantu yina kele bampangi na beto kati na kiminu” kasi beto kesadisaka diaka bantu yina kele ve Bambangi ya Yehova.—Bagalatia 6:10.