Kisalu ya kutunga yinzo ya yimpa ya ba mètre carré 2 787 yina kebanda kuyamba banzenza na kisika ya malongi ya Bambangi ya Yehova na Patterson, na New York na buala ya États-Unis, beto mekanisa ti kisalu yango kemanisa na katikati ya mvula 2023. Yinzo yango ya yimpa kevuanda na musée yina kevuanda na bisika tatu ya bafoto mpe kisika yankaka ya bafoto yina kebanda kubaluka mpe kusoba mbala na mbala, mpe yakevuanda na dikoki ya kuyamba banzenza 1200 konso kilumbu. Katula yau, mingi ya bayinzo yango ya Patterson kena kubongisama diaka, na kifuani bakena kusoba babima ya tekniki mpe babima yankaka yina bebaka. Kisalu yango ya kubongisa mpe ya kutunga mekuma pene ya katikati samu yamanisa kutungua.

Bampangi yina kena kutuadisa kisalu yango kutanaka na mambu ya mpasi yina maladi ya COVID-19 bimisaka. Lokola yakumaka mpasi kubaka bisadulu ya kutungila na ntangu yango ya maladi ya yimbi, yasalaka ti kisalu yango telema ntete. Na kifuani, ntangu beto kumaka na kitini ya mfunu ya ntungulu, yakumaka mpasi samu na kubaka ciment ya kusadila beton, kasi bampangi vuandaka na dikoki ya kubaka yina vuandaka mfunu samu na kumanisa kisalu ya kutula beton na bantangu yina mebonga. Katula yau, atako ntalu ya bisengo buelamaka diaka, bampangi na beto vuandaka na dikoki ya kusumba bisengo na ntalu ya mbote samu basalaka deja bakontra na ebandeli na bantu yina ketekaka yau tekila maladi yango.

Ntangu Betele kangamaka, bavolontere vuandaka na dikoki ya kusala na bayinzo na bau kondua kubaka retare na kisalu. Na ntangu mosi, yavuandaka mpasi kukutana na bamfumu ya Leta ya mbanza yango samu na minsiku yina pesamaka ya kukitanina na maladi ya COVID-19, yau salaka ti kisalu banda tambula malembe. Kasi, na kusalaka kintuadi na badepartema ya Betele mpe na bamfumu ya Leta ya kizunga, komite ya kutunga vuandaka na dikoki ya kubaka bayinsua na ntangu ya mbote na kusadilaka bavolontere mpe videoconference.

Lokola malako metadila karantene sobaka samu na mua ntangu, yakumaka mpasi kubokidisa bavolontere na site ya kisalu, yau salaka ti mambu yankaka ya mpasi buelama. Kasi na ebandeli ya ngonda ya Septembre 2020, beto bakaka diaka yinsua ya kubokidisa bavolontere yina mekukipesaka samu na kusala ntangu nionso samu bakuiza vuanda na site samu na kusala kisalu.

Mpangi ya nketo Jennifer Paul bakaka mbokodoso ya kukuenda sala na kisalu yango na ntangu ya COVID-19. Samu na kisalu yango ya kutunga, yandi tubaka: “Munu kezolaka sala kisalu ya ngolo. Kasi yakele kaka ve kisalu munu zolaka, kasi yakele nde bantu. Munu kena kumona nkubukulu ya Yehova kena kukuenda na ntuala na lusadusu na yandi.”

Bubu yayi, bavolontere kana 450 buela diaka bantu kana 350 kena kusala na proje yango ya Patterson. Bampangi na beto ya babakala mpe ya banketo kena kutatamana kumona mutindu Yehova kena kupesa bau bima yina bakele na yau mfunu samu banunga proje yango.—1 Bansangu 29:16.