Na Afrique du Sud, bantu yina bametulaka samu na kukotila mambote ya mababa pesaka Bambangi ya Yehova matondo mutindu bakesadisaka samu mababa kukimona mbote na kubimisaka bavideo ya kitoko na ndinga ya mababa ya Afrique du Sud (SASL). Diambu yango salamaka na kilumbu ya 15 Novembre 2021, na manima ya kubimisama ya mukanda ya Bagalatia mpe ya Baefezo yina kele na Masonukua ya Greki ya Buklisto ya Mbangudulu ya Yinza ya yimpa na ndinga ya mababa ya Afrique du Sud. Yau mesala ti mikanda ya Biblia na ndinga ya mababa ya Afrique du Sud kuma 10. Mikanda 4 yankaka kena kubongisama samu yabimisama na Avril 2022. Mikanda yango nionso kele na jw.org mpe na aplikasion JW Library Sign Language.

Minna Steyn, yina kele kilandi ya guvernema ya Cap-Occidental mpe muntu yina mezaba mbote mambu metadila kulonga, yandi metuba samu na Bambangi ya Yehova ti: “Munu kesepelaka mingi kutala bantu yina kesalaka bidimbu ya ndinga ya mababa, mpe munu kena kupesa bau mpe nkubukulu na bau felisitasion samu bakesalaka bidimbu ya mbote mpenza.”

Bongani Makama, yina kele ntuadisi ya nkubukulu ya bantu ya kieta na Swaziland (Eswatini), yandi metuba: “Felisitasion na Bambangi ya Yehova, samu na bangolo yina bakesalaka samu na mababa.” Yandi mebuela: “[Mababa] mebonga kuvuanda na Biblia na ndinga na bau. Yakele samu na yau nde beto kena kupesa Bambangi ya Yehova felisitasion mutindu bamebimisa Biblia samu na mababa na ndinga ya ntima na bau. Beto kena kuvingila na nsatu ya ngolo mikanda 66 ya Biblia bimisama na ndinga ya mababa.”

Na Afrique du Sud, bantu kana 450 000 ketubaka ndinga ya mababa. Na kati na bau bansamuni 283 kele mababa mpe kekuwaka ve. Na nzila ya ngolo yina Bambangi ya Yehova kena kusala, ‘bantu ya mitindu nionso’ kena kubaka nzayilu ya sikisiki ya kedika, na kati na bau yakele diaka na mababa yina kele na terituare ya filiale ya Afrique du Sud.—1 Timoteo 2:4.