Departema yina ketadilaka kisalu ya kutunga (LDC) na Afrique du sud kemanisa ntama mingi ve kisalu ya kubongisa diaka biro na Durban yina kevuanda biro ya mbangudulu ya ndinga ya mababa ya Afrique du sud (SASL). Filiale sumbaka yinzo yango na Mars 2020 mpe ntangu fioti na manima filiale sumbaka diaka bayinzo yina vuandaka penepene. Bambangudi kebanda kukuenda na bayinzo yango na ngonda ya Mai 2022.

Biro ya mbangudulu yango kele na bampangi ya Betele 17 mpe bavolontere 25 yina kepesaka maboko na mua ntangu. Kisika yina kele biro yango kesadisa na kubangula mbote mikanda na beto na bandinga 283 samu na bansamuni ya mababa mpe ya bantu yina kekuwaka mbote ve ya Afrique du sud, buela diaka bantu 450 000 yina kele mababa to yina kekuwaka mbote ve yina kezingaka na buala yango. Mingi kati ya mababa to bantu yina kekuwaka mbote ve ya Afrique du sud kezingaka na kizunga ya KwaZulu-Natal. Durban kele mbanza yina meluta nene na kizunga yango.

Mpangi Sibusiso Mzizi, yina kesalaka na ekipe ya mbangudulu ya ndinga ya mababa ya Afrique du sud, metuba: “Beto mendimisama ti biro yango ya yimpa kenatina bansamuni ya Afrique du sud mambote mpe yakekindisa bimvuka.”

Beto kena kupesa Yehova matondo na mutindu yandi kena kusakumuna bangolo na beto yina beto kena kusala samu na kupesa maboko na mbangudulu ya ndinga ya mababa ya Afrique du sud (SASL) mpe mutindu proje yango kena kuenda na ntuala.—Nkunga 127:1.