Na ngonda ya Juin 2022, bampangi kebanda kubongisa diaka yinzo mosi yina kele na baetaje 4, yakesadulua samu na bisika yankaka ya kuvuanda mpe babiro samu na filiale ya Angola. Bubu yayi, Betele ya Angola yina bamanisaka kutunga na 2003 kele na bisika fioti samu na bampangi 207 ya dibuta ya Betele.

Yakena kulomba bisika yankaka, samu bampangi yankaka ya dibuta ya Betele kena kuvuanda na bayinzo yankaka yina beto kefutilaka. Bampangi sumbaka yinzo yango na ngonda ya Décembre 2021. Yinzo yango kele ntama ve na Betele.

Yinzo yango kevuanda na bisika samu na kuvuanda 57 mpe babiro 60. Bashambre kevuanda na babiro ya fioti, babiro kevuanda samu na bantu mingi mpe yankaka samu na muntu mosi. Yinzo yango ya yimpa kevuanda diaka na bayinzo yina bantu mingi lenda kutakana mpe bayinzo yina balenda sadila bisalu mingi. Babiro kevuanda na bibaka yina balenda katula, kutula diaka, mpe kubongisa yau samu na konso nsadulu.

Bampangi ya dibuta ya Betele yina kena kuvuanda na bayinzo ya kufutila kekuiza kota na yinzo yango ya yimpa na ngonda ya Février 2024.

Mpangi Samuel Campos, yina kele mpangi ya Komite ya filiale metuba: “Beto vuandaka sambila mpe kusala kintuadi na Departeman ya kusala baplan mpe kutunga ya yinza ya mvimba samu na kukokisa nsatu yango. Kusumba mpe kubongisa diaka yinzo yango kele mvutu ya Yehova na bisambu na beto.”

Bansamuni kuluta 160 000 kele na Angola. Bantu kuluta 400 000 kutakanaka na Mbambukulu na mvula meluta, mpe bansamuni tuadisaka bandongokolo ya Biblia kuluta 200 000. Beto mendimisama ti Yehova kesakumuna kisalu ya kubongisa diaka yinzo yango ya yimpa yina kepesa maboko samu na mambote ya Kimfumu.—1 Bansangu 29:16.