Dibuta ya Betele ya Argentine mekota na Betele ya yimpa yina bametunga. Kompani mosi manisaka kutunga yau na katikati ya mvula 2021. Banda vana, Bampangi ya dibuta ya betele mpe bavolontere kena kutatamana kusala bisalu ya fiotifioti yina bikanaka lokola kukangikisa bakiti, bameza, bamfulu, baetajere, kusala bunkete ya mpinda, kubongisa bapompe ya maza, mpe bisalu ya kuran.

Yinzo yango kele na batima ya babiro yina kele na bisika ya kusadila 136 mpe babatima zole ya bisika ya kuvuanda yina kele na bashambre 98. Betele ya ntama tungamaka na bayinzo yina vuandaka bisika mingi. Kasi, Betele ya yimpa kena kusadisa Bampangi ya dibuta ya betele samu bavuanda mpe basala na batima kaka mosi. Yinzo yango kele na ba mètres-carrés 8 524 mpe yakele na nganda ya mbanza ya Buenos Aires, kapitale ya Argentine.

Mpangi Humberto Cairo, yina kele mosi ya bampangi ya Komite ya filiale, metuba: “Yehova monisaka kikadulu na yandi ya kukaba na proje yango. Kisika yango ya yimpa kele kitoko mpenza, mpe yakele pete kumona kidimbu ya jw.org.”

Mpangi Sebastian Rosso, yina kesalaka na Departema ya Kisalu, metuba: “Yakele mpenza dikabu yina mekatuka na Yehova. Yakele kisika yina mesalama samu na kukokisa bansatu na beto. Beto kele mpenza na butondi samu beto mekuma na Betele ya kitoko yina mefuana samu na kusala kisalu na beto mbote.”

Beto mendimisama ti Betele yango ya yimpa kesadisa dibuta ya Betele samu basala kisalu mbote mpe yakepesa kimbangi ya mbote na kisika yakele, samu na nkembo ya Yehova.—2 Bansangu 7:1.