Na ngonda ya Novembre mpe ya Décembre 2021, komite ya ONU yina ketadilaka yinsua ya bantu bakaka banzengolo zole yina kotilaka yinsua ya Bambangi ya Yehova ya kutubila bantu yankaka kiminu na bau. Banzengolo yango zole bakamaka samu na bampangi ya banketo yina bakangaka na bamfumu ya Leta ya buala ya Azerbaïdjan samu bavuandaka tubila bantu yankaka nsangu ya Biblia.

Na kilumbu ya 5 Novembre 2021, komite yango ndimisaka yinsua ya mpangi Matanat Gurbanova mpe Saadat Muradhasilova ya kusamuna. Bakangaka bampangi yango ntangu bafundaka bau na muntu mosi yina zabanaka ve na ngonda ya Novembre 2014. Balombaka na bampangi yango bafuta amande ya mbongo 1 500 Manats (880$) na muntu. Komite yina ketadilaka yinsua ya bantu tubaka ti kukangama ya bampangi yango ya banketo zitisaka ve nsiku mpe yalombaka na bamfumu ya Leta ya buala ya Azerbaïdjan baka bankubukulu samu mambu ya mutindu yina salama diaka ve na bilumbu kena kuiza.

Mpangi Matanat mpe mpangi Saadat kele diaka bampangi na kinsuni, batubaka: “Bamfumu ya Leta mpe zuzi kena kusosa kubangisa beto, kasi diambu yina kuminaka beto kindisaka diaka kiminu na beto. Yehova monisaka diaka ti diboko na yandi kele nkufi ve mpe yandi mezaba ntangu mpe mutindu ya kutanina bisadi na yandi.”

Na nzengolo mosi yina kokanaka bakamaka na kilumbu ya 21 Décembre 2021, komite ya ONU yina ketadilaka yinsua ya bantu tubaka ti bapolisi ya Azerbaïdjan zitisaka nsiku ve ntangu bakangaka bampangi ya banketo Jeyran Azizova mpe Gulnaz Israfilova samu na “kusala mambu metadila dibundu na bisika yankaka.” Na nzengolo yina babakaka, komite ya ONU yina ketadilaka yinsua ya bantu monisaka ti bampangi na beto ya banketo salaka ata kima mosi ve yina mebuka nsiku ya Leta na kutubilaka kiminu na bau.

Ntangu bavuandaka tala bankundi na mbanza ya Goranboy na Azerbaïdjan na Novembre 2016, Jeyran mpe Gulnaz samunaka nsangu ya Biblia na bantu yankaka. Mfumu mosi ya Leta ya mbanza yango fundaka bau na bapolisi, mpe bakangaka bampangi yango ya banketo. Na nsambusulu yina landaka, zuzi mosi fundaka bau ti bakele bantu yina tindamaka na kinsueki mpe yandi zengilaka bau amande ya 2 000 Manats (pene na 1 176$). Tribinale mosi ndimaka kitumbu yango. Na manima bampangi ya banketo nataka mambu yango na komite ya ONU yina ketadilaka yinsua ya bantu.

Banzengolo ya mbote ya bamfumu ya Leta kesadisaka beto samu beto sala kisalu na beto ya mfunu mingi na kimpuanza nionso. Beto kena kusepela kintuadi na bampangi na beto ya banketo, bayina kele kifuani ya mbote na yina metadila kusamuna nsangu ya mbote na vema.—Matayo 10:18.