Na kilumbu ya 29 mai 2022, mpangi Sylvain Bois, yina kele mpangi ya komite ya filiale ya Bénin, tubilaka kubimisama ya Biblia—Nsangu ya mbote ya Matayo na ndinga ya Fon. Kubimisama ya mukanda yango ya Biblia yina lenda tangama na bapareyi salamaka na programe mosi yina baanrejistreke na ntuala, yina bansamuni 7 000 mpe bantu yina kesepelaka na kedika landaka. Kubimisama na yau ya papie kevuanda na ngonda ya décembre 2023.

Atako Babiblia na ndinga ya Fon vuandaka ntete tekila kubimisama ya mukanda yayi, bakatulaka nkumbu ya Nzambi, mpe bafraze mingi yina kele na bambangudulu yango bangulaka masonukua ya ebandeli ya Biblia na sikisiki ve. Yakele diaka ntalu samu na kusumba yau, mpe bantu yina ketekaka yau, bakemangaka kutekila yau Bambangi ya Yehova.

Mukanda ya Biblia ya Matayo mebangula na sikisiki nionso Masonukua ya ebandeli ya Biblia. Na kifuani, Matayo 10:28 metuba: ‘Beno banga ve bantu yina kekufuaka nzutu kasi yina lenda kufua ve muela.’ Noti ya yinsi ya paje ya verse yango mesasila ti mpova ya ebandeli yina mebangulua na “muela” kemonisaka “bivuvu ya luzingu.” Mambu yango ya fiotifioti kesadisa bansamuni ntangu bakena kulonga bantu yina kesepelaka na kedika na kisalu na bau ya kusamuna.

Mpangi Palle Bjerre, yina kele mpangi ya komite ya filiale ya Bénin, metuba: “Mikanda na beto ketubilaka mingi mukanda ya Matayo. Mbangudulu yango ya Evanjile ya Matayo kesadisa bansamuni basamuna mpe balonga nsangu ya mbote. Beto kena kupesa Yehova matondo mpe ekipi ya mbangudulu samu na kisalu ya ngolo yina bamesala samu na kupesa maboko na kubimisama ya mukanda yango.”

Beto mendimisama ti mukanda yango kesadisa bampangi na beto yina ketubaka ndinga ya Fon samu batatamana kukokisa bansatu ya kimpeve ya bau mosi mpe ya bantu yankaka.—Matayo 5:3.