Na kilumbu ya 8 Mars 2022, komite ya kutunga ya proje ya Ramapo ya biro ya nene bakaka yinsua ya bamfumu ya Leta ya mbanza ya Tuxedo. Yinsua yango kesadisa samu na kubanda kubongisa nzila ya kukotila yina mekuenda tii na lupangu ya Ramapo. Katula yau, bampangi na beto kena kutatamana kuvingila kubaka yinsua ya nsuka samu na kubanda proje yango—yinsua ya plan ya mvimba yina bamfumu ya Leta ya mbanza ya Ramapo fueti pesa. a

Mpangi Robert McRedmond, yina kena kutuadisa komite ya kutunga, metuba: “Na ebandeli ya kisalu ya proje yango, beto bakaka nzengolo ya kubongisa diaka nzila yina menata tii na lupangu ya Ramapo. Yinsua yina bamfumu ya Leta mepesa bosi kesadisa beto beto bokidisa kompani yankaka samu na kusoba mpe kukumisa nzila yango nene, yakesala ti bivonza bika salama na nzila yango. Bakompani yankaka nde kena kusala kisalu yango mpe yakemanisa kisalu yango na katikati ya mvula yayi. Katula yau bavolontere ya kisalu ya kutunga kena kumanisa kutunga pon mosi ya ntama ya mabanga yina kele na nzila yango.”

Mpangi Gary Stradowski, yina kele na komite yango ya kutunga, metuba: “Beto vuandaka na kiese ya kubaka yinsua yango. Beto kena kukokisa malembemalembe lukanu na beto na kuvingilaka yinsua ya nsuka samu na kumanisa bisalu ya proje yina mebikana. Kana beto mebaka yinsua, kompani mosi kebanda kubongisa kisika yango ya kutunga na nsuka ya mvula 2022. Kana yamesalama plina, bavolontere kevuanda na dikoki ya kupesa maboko na katikati ya mvula 2023.”

Beto kele na kiese ya kubaka nsangu yango mpe beto kena kusambila Yehova samu yandi pesa beto mpeve na yandi samu yatatamana kutuadisa proje yango.—Zekaria 4:6.