Na kilumbu ya 15 Avril 2022, bamilion ya Bambangi ya Yehova na yinza ya mvimba kintuadi na bantu yina babokidisaka, salaka Mbambukulu ya Madia ya nkokila ya Mfumu, nkinzi yango ya mfunu vuandaka salama diaka ve na Bayinzo ya Kimfumu banda 2019. Bantu yina vuandaka ve na dikoki ya kukuiza na lukutakanu yango na Yinzo ya Kimfumu, balandaka yau na videoconférence.

Mbambukulu ya lufua ya Klisto kele lukutakanu yina meluta mfunu na mvula samu na Bambangi ya Yehova. Samu na maladi ya COVID-19, lukutakanu yango yina kesalamaka konso mvula salamaka na videoconférence bamvula zole. Bantu kuluta bamilion 21 kutakanaka na Mbambukulu na 2021.

Samu na bantu yankaka, na kifuani Markensia Remy, yina kevuandaka na Haïti, yavuandaka mbala na bau ya ntete kukutakana na Mbambukulu na Yinzo ya Kimfumu. Markensia, yina katukaka kubaka mbotama na manima ya mvula mosi kaka metuba: “Munu kele na kiese mingi mutindu munu mekutakana na Mbambukulu na Yinzo ya Kimfumu. Bampova kena kuzanga munu samu na kumonisa mutindu munu kena kukimona. Munu kena kukimona na kati ya dibuta mosi ya kitoko.”

Beto kena kutonda Yehova samu na lusakumunu na Yandi na Mbambukulu ya mvula yayi, mpe beto kele diaka na butondi na Yehova mpe na Muana na yandi Yesu Klisto samu na mambu ya nene yina basalaka samu na kumonisa ti bakezolaka beto ntangu nionso.—Yoane 3:16.