Maladi ya yimbi ya coronavirus (COVID-19) menata bansobolo na bisalu mingi ya Bambangi ya Yehova. Bakena kusala nionso yina balenda sala samu na kulanda malako ya bamfumu ya Leta ya babuala na bau mpe bakena kutatamana kusambila Yehova. Na babuala yina maladi yango kena kutungisa mingi, bampangi kena kusadila mayele ya mutindu na mutindu samu na kusamuna.

Mpangi mosi yina kevuandaka na Pise, na Italie, tubaka: “Beto mebaka mambote mingi na kusamuna! Lokola bantu mingi kele na bayinzo na bau, munu na nketo na munu beto talaka ba numero yina kele na telephone na beto mpe beto bandaka kusamuna na nzila ya videoconference. Beto mebaka bantu mingi ya kulonguka na bau mpe bantu mingi ya kuvutukila, yavuanda bantu yina beto zabaka banda ntama, yavuanda mpe bantu ya yimpa, beto kena kulutisa bantangu mingi na kusamuna, mpe beto mebaka bantu ya mbote ya kusolola na bau.”

Na Corée du Sud, maladi ya yimbi yayi mesala ti bansamuni sadila diaka mingi site jw.org mpe application JW Library. Na kifuani, mpangi mosi ya bakala sepelaka kumona mesaje ya muntu mosi yina mebikaka kulonguka Biblia bamvula tatu na ntuala. Nlonguki yango ya Biblia metuba ti maladi ya yimbi yayi tindaka yandi yandi kanisa kidimbu ya bilumbu ya nsuka. Yau tindaka mpangi na beto sadila opsion “Partager le lien” ya application JW Library samu na kutindila yandi na nzila ya mesaje mambu yankaka yina metadila disolo yango. Mpangi na beto metuba yakele “lukindusu kuzaba ti diambu yayi ya kidimbu ya bilumbu ya nsuka kena tinda bantu mingi basosa kuzaba diaka mambu mingi samu na Nzambi mpe Biblia.”

Balapolo mingi yina mekatuka na bafiliale ya yinza kena kumonisa ti bampangi na beto kena kupesa valere mingi na kisalu ya kusamuna. Yakele kiese mingi kumona mutindu bakena kusadila “mayele” samu na kutatamana kusamuna.—Mika 6:9.