Na mvula ya kisalu ya 2020 Bambangi ya Yehova na yinza ya mvimba kutanaka na mambu ya mpasi na kisalu na bau samu na Nzambi. Kasi bampasi yango monisaka nzengolo ya bampangi na beto ya kubikana ya kukuikama na Nzambi mpe kuvuanda na bumosi kati na bau.

Mpasi ya nene katukaka na maladi ya yimbi ya COVID-19, yina bimisaka mambu mingi yina bantu salaka mona ntete ve na yinza banda bamvula mingi.

Bambangi ya Yehova salaka bansobolo malu-malu na ntangu ya maladi yango. Bamonaka mitindu ya yimpa ya kukutakana samu na nsambudulu, kukindasana, mpe kusamuna nsangu ya mbote.

Tala ndambu ya ‘balapolo ya mbote’ samu na mvula yayi ya mpasi.—Bingana 15:30.

Na mvula ya kisalu yayi, nkubukulu na beto bimisaka Mbangudulu ya Yinza ya Yimpa ya Masonukua ya Nlongo na ndambu to na mvimba na yau na bandinga 36. Samu na bipekiseli ya maladi ya COVID-19, Babiblia mingi yina lenda tangama na telefone bimisamaka na balukutakanu na nzila ya videoconference. Bubu yayi Mbangudulu ya Yinza ya Yimpa na ndambu to na mvimba na yau mekuma na bandinga 193.

Kubanda kilumbu ya 18 Mars 2020, bampangi ya Kimvuka ya Ntuadisi kena kusalaka konso ngonda masolo ya spesiale na nzila ya video samu na maladi yayi ya yimbi na jw.org mpe na application JW Library.

Na lapolo ya ntete, Mpangi Stephen Lett tubaka ti atako maladi yayi ya yimbi kena kupesa mpasi, kasi yakele kidimbu ya ngolo yina kena kumonisa ti “beto kena kuzinga na kitini ya nsuka ya bilumbu ya nsuka. Kondua ntembe, kitini ya nsuka ya kitini ya nsuka ya bilumbu ya nsuka!”

Atako beto kena kuzinga na ntangu yayi ya mpasi, Mpangi Lett tubaka: “Lokola beto kele bisadi ya Yehova, mfunu ya kubanga kele ve.”

Konso lapolo ya video vuandaka na balapolo ya lukindusu ya yinza ya mvimba. Balapolo yango kena kumonisa nduenga ya kulanda na nzola lutuadusu yina kekatukaka na Kimvuka ya Ntuadisi. Na mambu mingi, bamfumu ya yinza pesaka bampangi na beto na yinza ya mvimba felisitasion na mutindu basalaka bansobolo na nsualu mpe na nduenga samu na maladi yayi ya yimbi.

Bamvula mingi meluta, Bambangi ya Yehova kekutakanaka kintuadi samu na kusala nkinzi ya Madia ya nkokila ya Mfumu yina kesalamaka konso mvula. Na mvula yayi, na bisika mingi, kukutakana kintuadi pekisamaka. Na yau, bampangi mpe mabuta salaka dimpa mpe vinu bau mosi mpe batalaka diskur ya Mbambukulu na nzila ya videoconference.

Na babuala yankaka, kusadila videoconference vuandaka mpasi. Yau diambu kuminaka bafiliale 11 ya Afrique. Bafiliale yango bakaka bankubukulu samu programe ya mbambukulu luta na ba chaine ya televizio mpe ya radio. Nkubukulu yango sadisaka bansamuni kuluta 407 000 balanda programe buela diaka bantu mingi yina kesepelaka na kedika yina beto lenda tanga kutu ve.

Kimvuka ya Ntuadisi tatamanaka kusadila nkubukulu ya kulutisa balukutakanu na nzila ya ba chaine mutindu kaka yasalaminaka samu na Mbambukulu, bapesaka nzila na bafiliale yankaka basadila mitindu yango samu na kulutisa balukutakanu ya kimvuka. Na kusalaka mutindu yina, bansamuni yina kele na babuala yina kele na makoki mingi ve vuandaka na dikoki ya kulanda konso sabala balukutakanu ya kimvuka na nzila ya ba chaine ya televizio mpe ya radio. Na ntangu yayi, bafiliale 23 kena kusadila nkubukulu yango, kati na yau bafiliale ya Afrique, Europe, Amerique du Nord, mpe Amerique du Sud.

Samu na mambu yina maladi yayi ya yimbi ya COVID-19 mebimisa, bampangi na beto mingi kena kunuana samu na kubaka bima ya mfunu ya kuvukila. Bakomite ya kupesa lusadusu kuluta 400 salamaka na yinza ya mvimba samu na kupesa lusadusu na bansamuni yina kele na mpasi ya kubaka bima ya mfunu ya kuvukila. Na mvula ya kisalu ya 2020, Kimvuka ya Ntuadisi ndimaka kubimisa dolare kuluta 18 milion samu komite ya kupesa lusadusu sadisa bansamuni kuluta 330 000 yina kena kukutana na mpasi ya maladi ya COVID-19.

Samu na mbala ya ntete, programe ya lukutakanu ya nene ya kizunga lutaka na nzila ya video. Bampangi ya Kimvuka ya Ntuadisi mpe bampangi yina kepesaka bau lusadusu salaka bitini nionso ya lukutakanu ya nene na nzila bavideo yina basalaka baanrejistrema na yau. Bavideo yango banguluaka na bandinga kuluta 500. Bantu vuandaka na dikoki ya kubaka programe ya lukutakanu ya nene na jw.org mpe na JW Library, samu bansamuni mpe bantu yina kesepelaka na kedika landa yau na lutanunu nionso na bayinzo na bau.

Katula kununga maladi yayi ya yimbi, bampangi na babuala mingi kena kukutana na banzomono ya ngolo.

Na Russie, na mvula meluta, bamfumu ya Leta kotilaka Bambangi kana nkama (100) na bayinzo na bau mpe bakangaka mingi kati na bau. Ntama mingi ve, bampangi ya babakala mpe ya banketo 42 kotaka na buloko na Russie, mpe buela diaka 2 na Crimée. Banda tribinale ya nene ya Russie bakaka nzengolo na 2017, bapolisi kotaka na bayinzo 1 000 ya bampangi na beto.

Érythrée nde kele buala yina Bambangi mingi kele na buloko, bubu yayi na buala yango bampangi 52 kele na buloko. Na kati na bau, Paulos Eyasu, Isaac Mogos, mpe Negede Teklemariam, yina kotaka na buloko samu bamangaka kukota na kisalu ya kisoda banda kilumbu ya 17 Septembre 1994. Buela diaka bampangi ya babakala mpe ya banketo 26 yina kotaka na buloko yameluta bamvula 10.

Beto kena kutatamana kusambila samu na bampangi na beto nionso yina kele na buloko samu bavuanda na kibakala. Beto mezaba ti kiminu na bau kena kukula ntangu bakena kukanga ntima na banzomono na bau.—Kusonga 2:10.

Na mvula ya kisalu yayi meluta, Bambangi ya yinza ya mvimba monisaka kiminu na bau na Yehova na kusadilaka mitindu yankaka ya kupesa kimbangi, babakaka mitindu ya yimpa ya kukindasana, mpe balandaka na dikebi nionso lutuadusu ya Kimvuka ya Ntuadisi mpe ya bamfumu ya Leta.

Bampangi na beto kemonisaka nzola na bau samu na Mvangi na mambu nionso bakesalaka samu na yandi. Kukuikama na bau kesadisa bau bakanga ntima na kumekama ya ngolo yina kekuiza na bilumbu kena kuiza.—Yakobo 1:2, 3.