Yayi mvula ya tatu, yina beto kena kusadila audiodescription na balukutakanu na beto ya nene. Bavideo ya audiodescription kevuandaka na bakomantere yina kesasilaka mambu yina bakena kumonisa na televizion samu bantu ya meso ya kufua to yina kemonaka mbote ve balanda malongi. Kubimisama ya bavideo ya audiodescription kele mosi ya bangolo yina Bambangi ya Yehova kesalaka samu na kusadisa bamilion kana 43 ya bantu na yinza ya mvimba yina kemonaka ve mpe bamilion 295 ya bantu yina kemonaka mbote ve samu na kubaka madia ya kimpeve.

Docteur Joel Snyder, prezida ya kimvuka ya audiodescription mpe muntu yina mezabana mingi na mambu metadila audiodescription, yandi tubaka: “Mukesepelaka mingi kumona mutindu Bambangi ya Yehova kekukipesaka samu na kusadisa bantu yina kele na bakieta. Ntangu bakesalaka bavideo, bakesalaka nionso samu bantu yina kemonaka ve babakusa yau na nzila ya audiodescription. Bantu mingi ve kesalaka yau samu na bantu yina mekufuaka meso. Matondo na Bambangi ya Yehova.”

Ntangu Kimvuka ya Ntuadisi bakaka nzengolo ti lukutakanu ya nene ya 2020 keluta na video samu na maladi ya coronavirus, banzengolo bakamaka diaka samu na kusadila audiodescription. Na mvula 2020, departema ya mbangudulu ya Biro ya nene ya Bambangi ya Yehova na mbanza ya Warwick, na New York, na buala ya États-unis, bimisaka bavideo ya audiodescription samu na lukutakanu ya nene. Na mvula 2021, kisalu yango kuendaka na badepartema yina bakesalaka tretema ya texte, yina kele na kisika ya malongi ya Watchtower kepesamaka na Patterson, na New York. Samu na kusala video ya audiodescription ya mbote, ekipe yango bakaka formasion na nzila ya videoconference.

Docteur Snyder metuba ti “nge lenda pesa bantu formasion samu na kusadila audiodescription na mutindu yina meluta mbote.” Yandi mebuela ti yakelombaka “kusadila bampova ya nkufi, ya puelele mpe yina bantu lenda bakusa mbote.”

Samu na kusala audiodescription ya video mosi ya lukutakanu ya nene, ekipe kebandaka na kuwa kitini ya audio kondua kutala video samu na kukitula na kisika ya muntu yina kemonaka ve to yina kemonaka mbote ve. Konso muntu ya ekipe kesonikaka banguilu na yandi samu na mbala ya ntete. Na manima, ekipe ketalaka diaka video yango na kutulaka dikebi bisika yina bantu kena kupema na masolo, samu bisika yango nde bakekotisa ba audiodescription.

Kukotisa ba audiodescription na kati ya masolo ya video mosi kevuandaka ntangu yankaka mpasi. Michael Millen yina kesalaka kintuadi na ekipe ya audiodescription ya Bambangi ya Yehova metuba: “Lokola ntangu yina bantu kepemaka na masolo na bavideo kevuandaka nkufi, yakelombaka beto baka nzengolo ya mbote samu na kubakusa video. Beto kesalaka ngolo samu na kumonisa ntangu, kisika, bantu, mpe diambu yina kena kusalama.”

Ekipe ya audiodescription fueti sosa ve kusasila mambu yina kena kumonana na video. Na mukanda na yandi (The Visual Made Verbal) Docteur Snyder mepesa malongi yayi na bayina kesalaka audiodescription: “Beno sasila mbote mambu samu bantu yina kekuwa yau babakusa bau mosi mambu yankaka. Na kifuani, kutuba ve: ‘Yandi mefuema,’ to ‘Yandi kele na kiadi.’ Kasi beno fueti tuba: ‘Yandi mekanga nkomi,’ to ‘Yandi kena kudila.’”

Ntangu ekipe ya audiodescription memanisa kusonika bampova ya video yango, mpangi mosi kekotisaka ndinga ya ba audiodescription. Yandi fueti tanga na ndinga mosi ya kukita mpe kusobasoba ve ndinga. Michael Millen metuba: “Ndinga ya muntu yina kena kutanga fueti luta ve bandinga ya bantu yina kele na video. Kana ndinga na yandi kele ngolo mingi to yandi kele na kiese mingi to kiadi mingi, bantu yina kena kuwa kekanisa ti yandi kele mosi kati na bantu yina kele na kati ya video.”

Kana ekipe memanisa kusala bansobolo ya nsuka, baketinda yau na bafiliale samu babangula mpe baanrejistre ba audiodescription yango na bandinga na bau. Michael metuba ti samu na balukutakanu ya nene zole yayi ya nsuka, ekipe ya audiodescription salaka bawola tatu ya kisalu samu na miniti mosi mpamba ya video.

Bubu yayi, Bambangi ya Yehova kebangulaka mikanda yina kesasilaka Biblia na bandinga kuluta 1 000. Atako beto tanga audiodescription ve na kati, bantu yankaka ketadilaka yau lokola ndinga. Michael metuba mutindu yayi: “Audiodescription kele mpenza mbangudulu samu na bantu yina kemonaka ve. Bakebangulaka bifikula ya bavideo na bampova samu na bantu yina kemonaka ve bakoka kuwa yau.”

Beto kena kupesa matondo na Yehova yina zola ti bantu nionso, yavuanda bakele yinki mutindu, babaka madia ya kimpeve mingi yina yandi kepesaka beto! Yezaya 65:13.