Na mua bangonda lutaka, Biblia Mbangudulu ya Yinza ya Yimpa ya Masonukua ya Nlongo bimisamaka na bandinga tatu na bisono ya bantu ya kufua meso: Ndinga ya Allemagne, ya Corée mpe ya Ukraine. Yina bantu lenda tanga na nzila ya telefone kele na jw.org. Bisono ya bantu ya kufua meso ya ndinga ya Corée mpe ya ndinga ya Ukraine lenda sadulua diaka na apareyi ya fioti yina kebangulaka bandinga yankaka na bisono ya bantu ya kufua meso, bakebokidilaka yau apareyi yina kebakaka bakopi. Bisono ya bantu ya kufua meso ya ndinga ya Allemagne lenda tangama na kusadilaka ekran.

Mbala mingi, Bantu mingi ya kufua meso kesadilaka mikanda ya electroniki mpe bapareyi yina kebakaka bakopi, kasi bayankaka kesepelaka kutanga yina kele na papie. Volimi ya ntete ya Biblia na bisono ya bantu ya kufua meso ya ndinga ya Allemagne bimisamaka deja na papie ya ngolo mpe batindaka yau na bansamuni. Na bangonda kekuiza, beto ketinda Biblia na bisono ya bantu ya kufua meso na bansamuni ya ndinga ya Corée. Lokola mvita kele na Ukraine, beto zaba ve yinki ntangu beto kevuanda na dikoki ya kutinda Biblia na bisono ya bantu ya kufua meso na bansamuni ya ndinga ya Ukraine.

Samu na kusala Biblia Mbangudulu ya Yinza ya Yimpa na bisono ya bantu ya kufua meso, beto kebangulaka ntete bampova nionso, buela diaka bareferanse nionso. Samu na bafoto, lokola bakarte, mpe bashema, fueti bangulua na forma yina bantu ya kufua meso lenda bakusa.

Mpangi mosi ya nketo yina mekufuaka meso na buala ya Allemagne tubaka: “Mambu yina munu ketangaka na bisono ya bantu ya kufua meso kebikanaka na mabanza na munu. Kutanga yau kele mbote mpenza na kisika ya kuwa yau. Yasadisaka munu munu zola mingi Yehova mpe munu tudila yandi ntima.”

Babiblia nionso yina kele na bisono ya bantu ya kufua meso kebimisamaka na Wallkill na New York, na buala ya États-Unis, na kusadilaka mashini ya bisono ya bantu ya kufua meso. Mashini yango ketulaka bisono ya bantu ya kufua meso na papie mosi ya ngolo, mpe na manima bakesangisaka yau kisika mosi mpe na volimi kaka mosi na manima baketindaka yau na babiro ya filiale samu na kupesa yau bansamuni. Biblia Mbangudulu ya Yinza ya Yimpa na bisono ya bantu ya kufua meso lenda vuanda na bavolimi kuluta 30 mpe yakebakaka kisika ya bametre zole na etagere.

Mpangi mosi yina kele mbangudi pesaka maboko na mbangudulu na bisono ya bantu ya kufua meso na ndinga ya Corée tubaka: “Ntangu beto kekanisaka na mambu ya mbote ya kimpeve mpe na lukindusu yina bampangi na beto yina mekufuaka meso kebaka na Biblia yango, nzola na beto samu na Yehova kekumaka diaka ngolo.”

Beto mendimisama ti Babiblia yango ya Mbangudulu ya Yinza ya Yimpa na bisono ya bantu ya kufua meso kepesa mambote na bampangi na beto ntangu Yehova kefulusila bau ‘bima ya mbote.’—Nkunga 107:9.