Lokola maladi coronavirus kena kubaka mingi biboba, bampangi na beto yina kele biboba kena kuzutisa na nduenga malako yina bamfunu ya Leta mpe kena kubikana na bayinzo. Kasi bakele ya kusundulama ve bau mosi mpe bakele ya kulemba ve. Bakena kusadila bamayele ya yimpa samu na kulanda balukutakanu mpe kusala kisalu ya kusamuna.

Na Rome, Italie, mpangi mosi ya nketo yina kele na mvula 94, yina bakaka mbotama na 1952, yandi vuandaka bima diaka ve na yinzo na yandi tekila maladi ya yimbi yayi banda. Atako yandi bandaka kutala balukutakanu na JW Stream, mua ntangu mingi lukutaka, yandi vuandaka diaka na dikoki ve ya kulanda balukutakanu. Kasi lokola bankulutu ya kimvuka na yandi ketulaka balukutakanu na nzila ya videocoference, yandi lenda mona bampangi na yandi mpe kubaka mambote na lukutakanu.

Na Spanish Fork, na Utah (Etats-Unis), mpangi mosi ya nketo Stephanie Aitken, yina kekuwaka ve, yandi kevuandaka kisika mosi mebongisamaka samu na biboba mpe bantu kekuendaka kuna mpamba mpamba ve. Nkulutu mosi na nketo na yandi telemaka na porte ya vitre, basadisaka mpangi yango na kutudila yandi application videoconference samu na kupesa yandi malako na ndinga ya mababa. Ntangu mpangi Aitken nungaka kutula application yango, yandi yambaka tablette na yandi. Yandi kele mpenza na kiese ya kutatamana kusolola na bampangi ya kimvuka na yandi.

Na yinza ya mvimba bampangi na beto buela diaka biboba kena kusadila mayele ya yimpa yina mefuana samu na kulutisa ntangu yayi ya mpasi ya maladi ya yimbi. Yakena kubambula beto moyo ti Yehova pesaka nsilulu ti bisadi na yandi kesadila na mutindu ya mbote “miliki ya makanda.” (Yezaya 60:16) Beto kele na kivuvu ti yandi ketatamana kukuma yina yandi lendaka kukuma samu na bisadi yandi na ntangu yayi ya mpasi.