Mbambukulu ya lufua ya Klisto ya 2020 vuandaka mutindu yankaka. Samu na mbala ya ntete, programe yango lutaka na ba chaînes ya televizio mpe ya radio na babuala mingi ya Afrika, na bandinga mingi.

Mayele yayi pesaka diluaku na bansamuni kuluta 407 000 samu balanda programe yango, buela diaka bantu mingi yina kesepelaka na malongi ya Biblia. Ata kana beto zaba ve ntalu ya bantu nionso yina landaka yau, beto mezaba ti bantu kuluta bamilio 150 vuandaka na dikoki ya kulanda yau.

Samu na maladi ya yimbi ya COVID-19, bantu mingi yina kutakanaka na mbambukulu na yinza ya mvimba salaka yau na nzila ya videoconference. Kasi na Afrika, bansamuni mingi yina kezingilaka na bisika yina Internet mpe rezo ya telefone kele ntalu. Bavuandaka ve na dikoki ya kulanda bavideo na streaming to kutelesharje yau.Yau yina, Kimvuka ya Ntuadisi pesaka nzila na bafiliale yankaka samu basolola na ba chaînes ya televizio mpe ya radio ya bisika ya mutindu na mutindu. Bavuandaka na dikoki ya kulutisa Mbambukulu na ba chaînes yango na ntalu ya kukita.

Tekila kilumbu ya Mbambukulu, bafiliale 11 (ya Angola, Bénin, Cameroun, Côte d’Ivoire, Ghana, Malawi, Mozambique, R.D.Congo, Sénégal, Zambie mpe ya Zimbabwe) Sololaka na ba chaînes ya radio mpe ya televizio. Babakaka bankubukulu samu kimpovi ya Mbambukulu luta na bisika 36, na babuala 16.

Angola

Ba chaînes 6 ndimaka kulutisa programe ya mbambukulu na bandinga 6: Ibinda, Kikongo, Kimbundu, Nyaneka, Portugais, mpe Umbundu. Balutisaka yau na bisika yina bantu kevuandaka mingi na buala na bau.

R.D.Congo

Nlonguki ya Biblia mosi ya nketo kubamaka samu na kulanda kimpovi ya mbambukulu yandi mosi, samu bantu ya dibuta na yandi keteleminaka Bambangi ya Yehova. Kasi ntangu yandi vuandaka bongama samu na kulanda programe yango, tata na yandi bokilaka yandi na salon mpe yandi tubilaka yandi: “Yamebanda!” ntangu yandi bimaka na salon, yandi sutukaka na kumona dibuta na yandi ya mvimba kutakanaka samu na kulanda kimpovi ya Mbambukulu na televizio. Bantu 10 na dibuta na yandi landaka mbambukulu.

Na buala mosi yina kele penepene ya Luena, muntu mosi yina kele Mbangi ya Yehova ve tubaka: “Bapastere na beto salaka kima mosi ve kasi beno beno kena kutatamana kusambila Nzambi na beno atako maladi ya yimbi ya COVID-19 kele. Beto kekuiza na kimvuka na beno!”

Ghana

Chaîne ya nene ya televizio ya buala ndimaka kulutisa kimpovi ya Mbambukulu na ndinga ya twi. Chaîne yango lutisaka piblisite samu na kulomba balanda kimpovi yango. Katula programe ya Mbambukulu, chaîne yango lutisaka bavideo Mpo na nini Yesu akufaki? Mpe Mpo na nini Nzambe atiki nzela na bampasi? Buela diaka bavideo ya miyimbu Na mokili ya sika mpe Yango oyo na miso.

Senegal

Mpangi mosi ya nketo tubaka: “Bavuandaka tuba samu na Yehova na televizio mpe na radio. Yavuandaka diambu ya kukamua! Beto kele na kiese mingi! Yakele diambu ya kusepedisa kuvuanda na Nzambi, Yehova!”

Mpangi yankaka ya nketo tubaka : “Ntangu munu kuwaka ti kimpovi ya Mbambukulu keluta na televizio, munu kikutubaka, ‘Yamekatula kiadi na mutindu beto bakaka ve ntangu ya kukabula ba invitation samu na COVID-19.’ Mbala mosi munu zabisaka bantu yina mukelongukaka na bau Biblia, bantu yina munu kevutukilaka mbala na mbala, mpe bantu nionso yina munu mezabana na bau yina kele Bambangi ya Yehova ve. Bantu 9 yina munu kelongukaka na bau Biblia mpe mabuta na bau balandaka kimpovi yango. Mpe mpangi na munu mosi ya dibuta yina landaka programe yango na televizio na ndinga Ziguinchor lombaka munu kana beto lenda solodila diaka diambu yango. Munu ndimaka na kiese!”

Nkubukulu yayi ya spesiale mendimisa diaka ti Yehova ‘lenda sala mambu nionso.’—Matayo 19:26.