Kilumbu ya 7 Avril 2020, maladi ya coronavirus pekisaka ve Bambangi ya Yehova na yinza ya mvimba basala nkinzi ya Mbambukulu ya lufua ya Yesu Klisto. Mpangi Stephen Lett ya Kimvuka ya Ntuadisi tubaka: “Virisi mosi ve, to maladi mosi ve, lenda pekisa beto kusala Mbambukulu mpe kumonisa butondi na beto samu na diambu yina Yehova mpe Yesu Klisto salaka samu na beto.” Yinki mutindu kedika ya bampova yayi memonana na mvula yayi?

Yayi kele disolo ya ntete kati na masolo yina kebima na site na beto na kitini Bansangu, yina ketubila mutindu bampangi na beto na yinza ya mvimba salaka Mbambukulu ya lufua ya Yesu ata na ntangu yayi maladi ya yimbi ya coronavirus. Na disolo yayi ya ntete beto ketubila mutindu Mbambukulu lutilaka na biro ya nene ya Bambangi ya Yehova mpe na Betele ya États-Unis.

Samu na kubuka ve nsiku ya Leta yina memanga ti bantu mingi kutakana kisika mosi, Kimvuka ya Ntuadisi bakaka nzengolo ti programe mosi kaka ya Mbambukulu tulama samu na bampangi nionso ya dibuta ya Betele. Kimpovi yango salaminaka na auditorium na Warwick. Mpangi Anthony Morris nde salaka kimpovi yango. Bampangi nionso ya dibuta ya Betele ya États-Unis bakaka diluaku ya kulanda programe yango na bashambre na bau. Atako bantu fioti kaka kudiaka dimpa mpe kunuaka vinu, biro ya Betele lutisaka mampa mpe vinu na bampangi nionso ya dibuta ya Betele.

Bampangi ya Betele vuandaka na dikoki ya kulanda programe ya Mbambukulu ya bimvuka na bau na nzila ya video. Diaka, bampangi ya Betele yina kele bankulutu vuandaka na dikoki ya kupona kusala kimpovi ya Mbambukulu ya bimvuka na bau na nzila ya video.

Bampangi mingi ya Betele tubaka ti Mbambukulu yayi, kele Mbambukulu mosi yina bamesalaka ntete ve. Atako basalaka yau kisika mosi ve na bampangi na bau baklisto, kasi na makanisi bavuandaka kintuadi na bampangi na bau ya yinza ya mvimba samu na kukanisa mambu zole ya mfunu mingi yina Yehova na muana na yandi yandi kezolaka mingi Yesu Klisto salaka samu bazolaka beto mingi.—Yoane 3:16; Matayo 20:28.