Na ntangu yayi ya maladi ya coronavirus, Bambangi ya Yehova kena kutatamana kubimisa Biblia na bandinga ya yimpa. Na kilumbu ya 28 Juin 2020, Biblia Mbangudulu ya Yinza ya yimpa bimisamaka na bandinga yiya (4): Swati, Tsonga, Zulu, mpe Chitonga. Mbangudulu ya Yinza ya yimpa ya Masonukua ya Greki ya Buklisto bimaka diaka na ndinga ya Kriol Belize mpe Totonac. Atako bampangi na beto vuandaka na dikoki ve ya kukutakana kisika mosi samu na maladi ya COVID-19, kasi bavuandaka na kiese ya kubaka Babiblia yango na nzila ya Internet. Babiblia yango bimisamaka ntangu bansamuni vuandaka landa badiskur na nzila ya video mpe batalaka programe yango na nzila ya videoconference to streaming.

Mpangi Geoffrey Jackson, mosi ya bampangi ya Kimvuka ya Ntuadisi, bimisaka Mbangudulu ya Yinza ya yimpa na ndinga ya Swati mpe Mbangudulu ya Yinza ya yimpa yina mebongisama diaka na ndinga ya Tsonga mpe Zulu na nzila ya Internet (Tala foto ya ntete). Bansamuni ya Afrika du Sud mpe ya Eswatini landaka programe na video.

Na terituare ya filiale ya Afrika du Sud, bantu pene 18.5 milio ketubaka ndinga ya Swati, Tsonga, mpe Zulu, yina kele na bansamuni 38 000.

Mpangi Augustine Semo, mosi ya bampangi ya komite ya filiale ya Malawi, tubilaka kubimisama ya Mbangudulu ya Yinza ya yimpa na mvimba na yau na ndinga ya Chitonga (Malawi).

Ekipi ya bambangudi salaka bamvula zole samu na kubangula Biblia na ndinga ya Chitonga na mvimba na yau. Mbangudi mosi ya nketo tubaka: “Ndinga ya Chitonga kele diaka na bandinga tatu ya fioti fioti. Bantu ya kizunga mosi kesadilaka bampova yina kokana ve na yina ya bantu ya kizunga yankaka. Na kukenga nionso, beto kesadilaka bampova yina bantu mingi lenda bakusa. Beto kesadilaka diaka banoti na yinsi ya paje samu na kusasila mbotembote na bantu bampova yina bakebakusa ve.”

Mbangudi yankaka ya nketo tubaka: “Biblia yayi kevuanda pete na bansamuni samu na kusadila yayu na kisalu ya kusamuna to na balukutakanu ya kimvuka samu ndinga kele pete mpe puelele, yina kesala ti yabika vuanda mpasi na kutanga mpe na kubakusa.”

Mpangi Joshua Killgore mosi ya bampangi ya filiale ya Amerique Centrale bimisaka Mbangudulu ya Yinza ya yimpa ya Masonukua ya Greki ya Buklisto na ndinga ya Kriol (Belize). Bantu kuluta 1 300 landaka programe na video.

Ekipi ya bambangudi mosi salaka bangonda 16 samu na kumanisa kisalu na bau. Na kutala mambote yina mbangudulu yayi ya yimpa menata, mosi ya bambangudi ya nketo tubaka: “Bosi nde bampangi mebaka Biblia na Mbangudulu yina kele ya kedika yina balenda tudila ntima. Yakevuanda lokola muinda yina kena kungengisa mbakusulu na bau.”

Mbangudi mosi ya nketo tubaka: “Na ntangu ya maladi ya COVID-19, bampangi yina ketubaka ndinga ya kriol kevuanda na dikoki ya kutanga Masonukua na ndinga na bau.” Mpe yandi buelaka diaka: “Yau lenda kindisa bau mpe yakesadisa bau bakitisa ntima mpe bakanga ntima na bampasi yina kena kuiza.”

Na Belize, bansamuni kele 867 na bimvuka 19 ya ndinga ya Kriol na Belize. Buela diaka bansamuni 58 yina kele na terituare yina ketubaka ndinga Kriol Belize na Etats-Unis.

Mpangi Jesse Pérez, yina kele mosi ya bampangi ya komite ya filiale ya Amerique Centrale, bimisaka Mbangudulu ya Yinza ya yimpa ya Masonukua ya Greki ya Buklisto na ndinga Totonac. Bantu pene ya 2 200 ya bimvuka 50 yina ketubaka ndinga ya Totonac na terituare ya filiale landaka programe yango na nzila ya video.

Ekipi ya bambangudi manisaka kisalu yango kaka na bamvula tatu. Mbangudulu yango kevuanda kisadulu ya mbote na kisalu ya kusamuna na bantu kuluta 250 000 yina ketubaka ndinga ya Totonac na Mexique.

Mbangudi mosi ya bakala metuba: Na lusuasanu na Babiblia yankaka ya ndinga ya Totonac, Mbangudulu ya Yinza ya yimpa ya Masonukua ya Greki ya Buklisto “mesadila ntubulu ya bubu yayi.” “Mbala yayi, yakevuanda pete samu na beto kusasila masolo ya mutindu na mutindu ya Biblia na bantu ya kizunga na beto.”

“Banda ntama bampangi na beto vuandaka na nsatu ya Biblia ya mutindu yayi,” mpangi yankaka ya bakala ya ekipi ya mbangudulu mebuela. “Tii bubu yayi, bansamuni yankaka vuandaka sala bambangudulu ya bau mosi ya baverse ya Biblia na Totonac na kusadilaka Biblia ya ndinga ya Espagnole samu na kusala badevuare na lukutakanu ya kati ya sabala. Kasi yakevuanda diaka na mfunu ve samu na kutanga Masonukua ya Greki.”

Mambu ya mfunu ya Mbangudulu yango ya yimpa kele ti yakele na banoti na yinsi ya paje yina kena kusasila bampova yankaka yina kele na kati ya Biblia yango. Bansasulu yango kena kusadila bampova yina mesuasana ya ndinga ya Totonac yina bantu ya bisika yankaka ketubaka, yau kesala ti bantu nionso yina ketubaka ndinga yango basepela.

Beto kena kusepela kintuadi na bampangi na beto yina mebaka Babiblia yina kele na bandinga ya kubutukila. Beto mezaba ti kiminu na bau kekindusua ntangu bakesadila ‘mbele ya kimpeve’ na kisalu na bau ya kusamuna mpe na ndongokolo ya bau mosi ya Biblia.—Baebreo 4:12.