9 MAI 2022
BANSANGU YA BABUALA NIONSO

Na mbanza ya Crimée, mabuta kena kukanga ntima na lusadusu ya Yehova

KUWA NA

Ntama mingi ve, tribinale ya kizunga ya Nakhimovskiy, na mbanza ya Sevastopol kebaka nzengolo ya nsambusulu samu na mpangi Vladimir Maladyka, Vladimir Sakada, mpe Yevgeniy Zhukov. Prokirere tuba ntete ve kitumbu yina bakepesa bau.

Badati ya mambu kuminaka bau

Kilumbu ya 1 Octobre 2020

Basoda ya FSB kotaka na bayinzo ya mabuta ya Bambangi ya Yehova 9 na Sevastopol, buela diaka bayinzo ya Maladyka, Sakada, mpe Zhukov. Ntangu bavuandaka sosasosa na yinzo ya mpangi Maladyka, basoda monaka pake ya miliki ya pusiere. Batubaka ti miliki yango kokanaka na “drogi,” na yau batindaka mpangi Maladyka mpe nketo na yandi, Nataliya, na opitale yina ketalaka maladi ya yintu samu basala bau baekzamen. Babikaka mpangi Nataliya kaka na kilumbu yango. Kasi babikaka ve mpangi Maladyka, buela diaka mpangi Sakada mpe Zhukov, yina batulaka na buloko samu na mua ntangu. Na kilumbu yina landaka, banataka bau na buloko.
Kilumbu ya 23 Mars 2021

Bavutulaka mpangi Sakada na yinzo na yandi yina bakena kusunga na basoda. Batulaka yandi mua apareyi na nzutu na yandi samu na kuzaba kisika yandi kele mpe bapekisaka yandi kusadila Internet, kubokila bantu na telefone, to kusolola na bampangi yankaka samu na diambu yina bamekangila yandi
Kilumbu ya 30 Mars 2021

Bavutulaka mpangi Maladyka na yinzo na yandi yina bakena kusunga na basoda
Kilumbu ya 17 Mai 2021

Babikaka mpangi na Zhukov na manima ya bangonda 7 mpe bakena kusunga yinzo na yandi na basoda
Kilumbu ya 30 Septembre 2021

Tribinale bandaka kusambisa yandi

Mambu metadila bau

Vladimir Maladyka

Kubutuka: 1963 (na Yenakievo, na Ukraine)

Disolo ya luzingu: Yandi vuandaka sala kisalu ya kubongisa baavion mpe yandi vuandaka mekanisien banda bamvula mingi. Yandi kuelaka Nataliya na1986

Yandi bandaka kusosa Nzambi ntangu dibuta na yandi kutanaka na mambu ya mpasi. Yandi kutanaka na Bambangi ya Yehova na nzila ya leki na yandi ya bakala. Yandi bakaka mbotama kintuadi na Nataliya na 1997

Mambu yina yandi metuba

Yinki mutindu Yehova sadisaka dibuta na nge na nzila ya bampangi?

Ntangu munu vuandaka na buloko, bampangi vuandaka pesa nketo na munu lusadusu ya kinsuni, ya makanisi mpe ya kimpeve. Bavuandaka bokila yandi mbala na mbala to kutindila yandi bamesaje mpe bakarte samu na kuzaba kana yandi kele mbote. Bampangi yankaka vuandaka kuenda kuta yandi na yinzo samu na kukindisa yandi.

Bampangi mingi na kimvuka vuandaka tadila yau lokola diluaku ya nene ya kusala yina balendaka samu na kupesa lusadusu. Bampangi nionso na kimvuka vuandaka pene ya kupesa lusadusu, bavuandaka sala “na bumosi” samu na kupesa lusadusu.—Sefania 3:9.

Vladimir Sakada

Kubutuka: 1970 (na Kiev, na Ukraine)

Disolo ya luzingu: Yandi bakaka formasion samu na kuzaba kusadila mashini mpe yandi salaka kisalu ya kisoda. Yandi kesalaka kisalu ya kutunga bayinzo. Yandi kuelaka Svetlana na 2005

Yandi yundukaka na dibuta yina vuandaka ndima ve ti Nzambi kele. Yandi bandaka kusepela na Biblia ntangu nkundi na yandi monisaka yandi nkumbu ya Nzambi. Nduenga ya Biblia bendaka dikebi na yandi na Mpova ya Nzambi. Yandi bakaka mbotama na 1991

Mambu yina yandi metuba

Yinki dilongi beno bakaka nge na nketo na nge na yina metadila mfunu ya kusalaka mbala na mbala mambu ya kimpeve?

Mambu ya kusuana ya nsambudulu na beto kele na nguizani. Yakesalaka kintuadi lokola “grupe ya misuni” ya kimpeve. Beto kesadilaka mbala na mbala misuni yango na kubongisaka balukutakanu samu na kukabudila bampangi na kimvuka na kisalu ya kusamuna, na kusambilaka mpe kulongukaka Biblia konso kilumbu, mpe kuvuandaka kintuadi na bampangi na beto . . . Atako bisalu na beto kele na bipekiseli, beto kena kutatamana kusosa mitindu ya kutatamana kusambila Yehova samu nguizani na beto na yandi vuandaka kaka ngolo.

Yevgeniy Zhukov

Kubutuka: 1969 (na Sevastopol, na Crimée)

Disolo ya luzingu: Yandi butukaka na dibuta yina vuandaka na bantu mingi. Tata na yandi kufuaka ntangu yandi vuandaka na bamvula 14

Ntangu yandi vuandaka ntuenia, yandi longukaka kubula piano na kalasi ya miziki. Yandi bakaka formasion ya kusala batiyo mpe na manima yandi salaka na izini

Yandi bandaka kusosa kuzaba mfunu ya luzingu na manima ya kusala kisalu ya kisoda. Mama na yandi sadisaka yandi samu na kulonguka Biblia, mpe yandi bakaka bamvutu ya mbote na biuvu na yandi. Yandi bakaka mbotama na 1997

Mambu yina yandi metuba

Yinki mutindu Yehova sadisaka nge ntangu nge vuandaka na buloko?

[Na ebandeli ya mvula 2021,] munu vuandaka kukitungisa samu munu zabaka ve mutindu munu kesala Mbambukulu. Yavuandaka samu na mbala ya ntete yina yalombaka munu sala Mbambukulu kisika mosi ve na kimvuka. Na yau, munu sambilaka, mpe Yehova pesaka mvutu na kisambu munu na kupesaka munu ngolo mpe nduenga. Na lusadusu ya Yehova, munu salaka diskur ya Mbambukulu kintuandi na bantu zole yina munu vuandana na bau shambre na buloko. Yau salaka ti babaka kimbangi ya mbote.

Beto mendisama ti Yehova kesadisa bampangi na beto babikana ngui na kiminu na bau mpe bampangi nionso yina kena kukutana na mikakatano na mbanza ya Crimée.—1 Batesalonika 3:12, 13.

NEWS RELEASES