Na kilumbu ya 23 juin 1947, Bambangi ya Yehova sonikisika Sociedade Torre de Vigia de Bíblias e Tratados (Watch Tower Bible and Tract Society) na Brésil. Yau nde nkumbu yina Bambangi ya Yehova sadilaka samu na mbala ya ntete yina bandimamaka na Leta na buala ya Brésil yameluta bamvula 75. Bampangi na beto kutanaka na kutelemina samu na kubaka yinsua na Leta.

Na kilumbu ya 13 octobre 1945, bansamuni na Brésil kabulaka baletre na babiro ya Leta samu Bambangi ya Yehova ndimama na Leta. Na buala ya mvimba, bansamuni kana 400 vuandaka na dikoki ya kubaka basinyatire ya bantu 44 411. Batindaka letre na prezidan kasi babakaka ve mvutu.

Na 1946, Brésil bandaka kusadila bansiku ya yimpa. Bansiku yango ya yimpa vuandaka na nsiku yina pesaka Watch Tower Bible and Tract Society yinsua ya kusonama na Leta. Na mvula yango, bansamuni kana 442 vuandaka samuna na buala yango konso ngonda.

Bamfumu ya mabundu sepelaka ve mutindu Bambangi ya Yehova ndimamaka na Leta. Bamvula tatu na manima, na kilumbu ya 3 novembre 1949, bamfumu ya mabundu nungaka kutula prezidan ya Brésil mbamba samu yandi tula sinyatire na nsiku mosi samu na kupekisa Watch Tower Society. Bampangi nataka diambu yango na batribinale. Diambu yango tatamanaka tii na kilumbu ya 8 avril 1957, ntangu prezidan ya yimpa bakaka nzengolo yina nungisaka Watch Tower Bible and Tract Society.

Atako bampangi vuandaka kutana na mambu ya mpasi na diambu metadila kusamba, kasi Yehova tatamanaka kusakumuna kisalu ya kusamuna. Mpangi Djalma Mendes Souto, yina bakaka mbotama na 1941 mpe yandi vuandaka mosi ya bantu na kati ya bantu ya ntete ya Watch Tower Society na Brésil, tubaka: “Kiminu na beto, kiese na beto, mpe kivuvu na beto na Yehova kitaka ve, mpe samu na yau, ntalu ya bansamuni tatamanaka kukuma mingi. Beto sepelaka mingi na 1947, ntangu beto kumaka samu na mbala ya ntete na bansamuni kuluta 1000.”

Banda vana, ntalu ya Bambangi ya Yehova na Brésil tatamanaka kukuma mingi. Na 2021, ntalu ya bansamuni na Brésil kumaka 913 479, mpe bantu 2 184 856 kutakanaka na Mbambukulu ya lufua ya Klisto. Lukutakanu ya nene ya 2021 yina vuandaka na yintu ya diambu “Kondima—Nguya na biso!” banguluaka na bandinga 15, na kati na yau bandinga 10 yina ketubamaka kuna.

Beto kena kubaka lukindusu na kumona mutindu Yehova kena kutatamana kusakumuna kisalu na beto na Brésil. Kukanga ntima ya bampangi na beto atako bampasi na diambu metadila kusamba kena kumonisa puelele ti Yehova ketaninaka bantu yina ketudilaka yandi kivuvu.—Yezaya 25:9.