23 FÉVRIER 2022
BRÉSIL
Bamvula ya ngolo mpe bapotopoto mebebisa mbanza mosi yina kevuandaka na zulu ya mongo na Brésil
Na kilumbu ya 15 février 2022, bamvula ya ngolo nataka bapotopoto ya ngolo yina bebisaka mbanza ya Petrópoli yina kevuandaka na zulu ya mongo na kizunga ya Rio de Janeiro, na Brésil. Bamvula yango bebisaka bayinzo mpe bisalu mingi. Basantimetre 26 ya kitezo ya maza kitaka kaka na kilumbu mosi, diambu yina salama ntete ve na mbanza yango.
Mambu yina kuminaka bampangi na beto
Mpangi mosi bakaka mpasi ya ngolo mpe banataka yandi na opitale. Diambu ya kiadi, muana na yandi ya bakala ya bamvula zole kufuaka ntangu bapotopoto nataka yandi
Mpangi mosi yankaka ya bakala kufuaka
Bansamuni 86 bikaka bayinzo na bau
Bayinzo zole kubuaka
Bayinzo 15 bebisamaka ngolo
Bayinzo ya Kimfumu zole bebisamaka ngolo ve
Bangolo yina beto salaka samu na kupesa lusadusu
Komite samu na kupesa lusadusu salamaka samu na kutuadisa kisalu ya kupesa lusadusu
Nkengi ya kizungidila mpe bankulutu ya bimvuka kena kupesa bampangi bima ya kudia, maza, bilele, mpe balukindusu ya Biblia
Bampangi yina bikaka bayinzo na bau kena kuvuanda samu na mua ntangu na bampangi ya mabuta na bau ya kinsuni to na mabuta ya Bambangi ya Yehova
Kisalu yango ya kupesa lusadusu kena kusalama na kulanda malako ya COVID-19 samu na kukitanina
Lokola beto kena kusambila samu na bampangi yina mebuila kisumbula, beto mezaba ti Yehova ‘kebomba bantima na bau mpe yandi kepesa bau ngolo,’ mingimingi samu na bantu yina mefuila bantu yina bakezolaka.—2 Batesalonika 2:16, 17.