13 JUIN 2022
CHILI
Biblia Mbangudulu ya Yinza ya Yimpa ya Masonukua ya Greki ya Buklisto mebimisama na ndinga ya Mapudungun
Na kilumbu ya 5 juin 2022, mpangi Jason Reed, yina kele mpangi ya komite ya filiale ya Chili, tubilaka kubimisama ya Biblia Mbangudulu ya Yinza ya Yimpa ya Masonukua ya Greki ya Buklisto na ndinga ya Mapudungun yina lenda tangama na apareyi mpe na papie. Balombaka na bimvuka yina ketubaka ndinga ya Mapudungun ya buala ya mvimba balanda programe yango mbala mosi na ba TV na bau. Bantu kana 800 landaka programe yango.
Mpangi mosi ya nketo kele na kiese ya kubaka Biblia na yandi
Mingi ya bantu ya Mapuche yina kezingaka na katikati mpe na bitini ya sud ya Chili mpe ya Argentine, kati na océan Pacifique mpe océan Atlantique. Na bizunga yango, yakele na bima mingi ya kusuasana, bamfinda ya nene, bavolkan, bashene ya mongo ya yinda, mpe bantoto ya pla. Bantu ya Mapuche kevuandaka na kikadulu ya kuyamba banzenza mpe bakevuandaka na luzitu ya ngolo na bima ya nlongo.
Banda 1901, bitini ya Biblia vuandaka na ndinga ya Mapudungun mpe na 1997 sosiete mosi ya Biblia bimisaka Mbangudulu ya Masonukua ya Greki ya Buklisto. Kasi bantu vuandaka na nsatu ya mbangudulu ya sikisiki mpe ya puelele. Na kifuani, mbangudulu ya 1997 sadilaka mpova “dikuluzu” samu na kutubila kima yina bakominaka Yesu. Kasi, Biblia Mbangudulu ya Yinza ya Yimpa kesadilaka mpova “yinti” na ndinga ya Mapudungun samu na kumonisa ti Yesu kufuaka na zulu ya yinti ya kusungama.
Yakele mfunu kusimba ti na ntangu batubilaka kubimisama ya Biblia Mbangudulu ya Yinza ya Yimpa yina lenda tangama na apareyi, kaka na ntangu yango mpe bantu yina sanganaka na Bayinzo ya Kimfumu 23 samu na kulanda programe yango bakaka Biblia na bau ya papie. Mpangi Jorge González, yina kele mpangi ya komite ya filiale, sasilaka ti: “Bantu ya Mapuche kevuandaka na mukakatano ya kuzitisa bima ya nlongo yina kele na version numérique, na kifuani Mpova ya Nzambi. Kasi beto mendimisama ti bantu mingi kesepela kubaka Biblia Mbangudulu ya Yinza ya Yimpa ya Masonukua ya Greki ya Buklisto na ndinga ya Mapudungun yina mebimisama na papie.”
Beto kena kusambila ti Biblia yango kesadisa bantu mingi ya ‘makanda nionso’ samu bazaba Yehova mpe basambila yandi.—Yezaya 2:2.
Tala diaka...
BIUVU YINA BANTU KEYUVUSAKA MINGI
Bambangi ya Yehova kevuandaka na Biblia ya bau mosi?
Kusadila bambangudulu mingi ya Biblia lenda sadisa nge nge sepela na ndongokolo na nge ya Biblia. Mambu 3 yina mesala ti Biblia—Libongoli ya Mokili ya Sika vuanda mbangudulu yina mebonga nge sadila na bandongokolo na nge.
MUTINDU MAKABU YINA NGE KEPESAKA KESADULUAKA
Kubimisa mukanda yina meluta mikanda nionso
Kubangula, kubimisa, mpe kukangikisa Biblia—Mbangudulu ya Yinza ya Yimpa mesangisa mambu mingi yina kutu nge lenda kanisa ve.
BIUVU YINA BANTU KEYUVUSAKA MINGI
Bambangi ya Yehova kendiminaka Testama ya ntama?
Bitini yankaka ya Biblia memanisaka ngala? Sosa kuzaba mambote yina Baklisto lenda baka na masolo mpe malongi ya mfunu yina kele na Masonukua ya Ebreo.