Mvula 2022 kele aniversere ya bamvula 100 banda Bambangi ya Yehova bandaka kusamuna na ile ya Chypre. Ntumua Paulo samunaka na ile yango kintuadi na Barnabasi yina vuandaka muntu ya Chypre, na vuayaje na yandi ya ntete yina yandi salaka lokola misionere. Na ntangu na beto, yamemonana ti nsangu ya mbote kuizaka samu na mbala ya ntete na 1922 ntangu mfumu ya dibundu mosi bakaka mua mukanda Does the Soul Die? (Muela kekufuaka?)

Bamvula zole na manima, nlonguki mosi ya Biblia na nkumbu ya Cyrus Charalambous, yina vuandaka zinga na États-Unis, vutukaka na Chypre. Yandi bandaka kisalu ya kusamuna na vema nionso mpe yandi vuandaka tinda trakte Où sont les morts? (Bantu ya kufua kekuendaka wapi?) na bambanza mpe na babuala ya Chypre.

Antonis Spetsiotes bakaka mosi ya batrakte yango. Lokola mambu yina yandi tangaka simbaka ntima na yandi, Antonis bandaka kutubila mambu yango na finangani na yandi Andreas Christou. Na manima, babakala yango zole bandaka kutubila bantu yankaka mambu yina balongukaka.

Dibundu ya Orthodoxe Greece teleminaka kisalu na bau ya kusamuna, mpe bakukaka mpangi Antonis mpe Andreas. Balembaka ve kusamuna. Na 1930, bangolo yina basalaka salaka ti kimvuka ya ntete salama na ile yango na buala ya Xylophagou.

Bampangi yango na buala ya Chypre bakaka balusakumunu na kisalu na bau ya kusamuna ntangu misionere ya ntete yina salaka kalasi ya Gileade, Antonios Karandinos, kuizaka na 1947. Na 1948, bansamuni 50 vuandaka samuna na vema na ile yango, mpe biro ya filiale ya ntete tulamaka. Na 1960, bampangi salaka nionso samu kisalu na beto zabana na Leta. Kaka na manima ya bamvula zole, Yinzo ya Kimfumu ya ntete tungamaka na Nicosie. Ntalu ya Bambangi ya Yehova tatamanaka kubuelama, mpe Betele ya nene ya yimpa zibukaka na 1969.

Ntangu kisalu ya kusamuna vuandaka kuenda na ntuala, mikakatano vuandaka buelama. Na katikati ya mvula 1960, babandaka kukanga bampangi ya babakala ya bantuenia samu bamangaka kukota na kisalu ya kisoda. Baniokolaka ndambu kati na bau na basoda samu na kutinda bau na kingolo bakota kisalu ya kisoda.

Mikakatano yankaka bimaka na 1974 ntangu mvita bandaka na ile yango. Bampangi na beto kana 300 tinaka buala. Yalombaka na dibuta ya Betele bakatuka na Betele. Bampangi na beto na yinza ya mvimba bandaka kusadisa bampangi na Chypre na kutindilaka bau bima ya kuvukila. Bampangi yina vuandaka na makoki pesaka bampangi na bau Baklisto yina tinaka bisika ya kuvuanda.

Na bamvula yina landaka, bampangi tatamanaka kusamuna. Katula yau, na 2006, bampangi salaka diambu mosi ya mfunu mingi na lukutakanu ya nene yina salamaka na mbanza ya Limassol, yina vuandaka na yintu ya diambu «La délivrance est proche!» (Luvulusu mekuma pene.) Bambangi ya Yehova nionso na buala ya Chypre vuandaka na dikoki ya kusangana kisika mosi na nkinzi mosi ya nene samu na mbala ya ntete na manima ya bamvula mingi.

Bubu yayi, yakele na bansamuni 2 866 yina kele na bimvuka 41 mpe na bagrupe 17, na bandinga ya kusuasana 14 yina ketubukaka na ile yango. Na 2021, bantu 5 588 kutakanaka na Mbambukulu ya lufua ya Klisto.

Beto kena kusepela kintuadi na bampangi na beto ya babakala mpe ya banketo yina kele na buala ya Chypre. Beto mezaba ti na lusadusu ya Yehova baketatamana kulanda nzila kaka mosi.—Bafilipi 3:16.