Ngonda ya Mars 2022 kele aniversere ya bamvula 50 yina Bambangi ya Yehova mesala na El Salvador. Na manima ya kubaka yinsua na Leta na kilumbu ya 27 Mars 1972, ntalu ya bansamuni na El Salvador buelamaka na nsualu, na 1972 ntalu ya bansamuni vuandaka 2 524, mpe na 1976 yakumaka na 5 632. Bubu yayi, bansamuni kele kuluta 38 000 na bimvuka 662.

Bamisionere kuizaka na buala yango na mvula 1945 mpe bakukipesaka na kisalu ya kusamuna. Na ntangu yango, bavuandaka na dikoki ya kubaka yinsua ya Leta samu na kukuma bana buala. Bimvuka bandaka kusalama, mpe biro ya filiale tulamaka na ngonda ya Mai 1946.

Na mvula 1968, nsiku mosi ya yimpa bimaka yina vuandaka pekisa bamisionere na kuvuanda bamvula kuluta 5 na buala yango. Bampangi bakusaka ti kisalu ya kusamuna lendaka tambula mbote ve, kana bamisionere kele ve, bampangi salaka nionso samu na kumeka kubaka yinsua ya Leta samu na kubikana na buala yango.

Pene ya nsuka ya mvula 1971, biro ya filiale bokilaka bankulutu 30 ya buala El Salvador samu na kusolola diambu yango. Na lukutakanu yango, mpangi Baltasar Perla, Sr., yina na manima kumaka mpangi ya komite ya filiale, lombaka na bankulutu nionso yina vuandaka vana bapesa yandi bakarte na bau ya Leta yina guvernema mepesaka bau. Yandi zabisaka bankulutu yango ti bankumbu na bau mpe baadrese na bau ketulua na mukanda yina bakesonikina guvernema samu babaka yinsua ya Leta.

Mpangi Juan Antonio Flores, mosi ya bankulutu yina vuandaka na lukutakanu yango, metuba: “Mpangi Perla, Sr., sasilaka beto ti lokola bankumbu mpe baadrese na beto ketulua na mukanda yango, kana bamfumu ya Leta zola pekisa kisalu na beto, beto kevuanda bantu ya ntete yina bakekanga mpe yina baketula na buloko.” Mpangi Perla, Sr. lombaka na konso muntu yina vuandaka banga kana yandi lenda vutudila yandi karte na yandi. Muntu mosi ve ndimaka bavutudila yandi karte na yandi. Diambu ya kiese, guvernema pekisaka ata fioti ve kisalu na beto, mpe muntu mosi ve kotaka buloko.

Lukanu yina beto vuandaka na yau nungaka, mpe nkubukulu ya Bambangi ya Yehova ndimamaka na Leta mvula yina landaka. Banda vana, bamisionere vuandaka na dikoki ya kubaka yinsua ya kuvuanda na buala samu na ntangu ya yinda. Katula yau, biro ya filiale vuandaka na dikoki ya kukotisa mikanda na buala, kukotila kiminu ya bampangi na bakalasi mpe na ntuala ya bamfumu ya Leta na diambu metadila kukota na mambu ya politiki.

Na kilumbu ya 26 Avril 1972, zulunalo mosi ya buala ya El Salvador samunaka diambu yina fueti vuanda lukanu ya nkubukulu yina mezabana na Leta: “[Ya] kusamuna malongi ya Biblia mpe bansangu ya mbote ya Kimfumu ya Nzambi samu na kupesa kimbangi samu na nkumbu, nsangu, mpe Kimfumu ya Yehova Nzambi nkua-ngolo-nionso.”

Na manima ya bamvula banda malako yango pesamaka, Bambangi ya yehova ya buala ya El Salvador tatamanaka kusamuna mambu metadila Yehova.—Yezaya 25:9.