Na kilumbu ya 2 Avril 2022, mpangi Alberto Rovira, yina kele na Komite ya filiale ya Espagne, tubilaka kubimisama ya Biblia Mbangudulu ya Yinza ya Yimpa yina lenda tangama na baapareyi na ndinga ya Catalan. Bambangi ya Yehova yina ketubaka ndinga ya Catalan na buala ya Andorre mpe na bizunga mingi ya Espagne, kati na yau îles Baléares, Catalogne mpe na Valence, landaka programe yango ya spesiale, bantu yina landaka yau na nzila ya JW Stream, bavuandaka bantu kuluta 3 000. Bimvuka kebaka Babiblia yango ya yimpa ya papie bangonda kena kuiza.

Bambangudi bandaka kubimisa Babiblia na ndinga ya Catalan kubanda na bamvula 1 200 mpe 1 300. Mosi ya Babiblia yango yina mesuasana na Babiblia yankaka bimisamaka na kati ya bamvula 1 282 mpe 1 325. Yakele na baparagrafe ya mikanda 18 ya Biblia na ba rime, yina kesadisaka bantu samu babakusa yau.

Bambangudulu mingi ya Biblia yina kele na ndinga ya Catalan kesadilaka ntubulu ya ntama yina kevuandaka mpasi samu bantu yina kena kutanga yau babakusa yau. Bambangudulu yankaka mekatulaka nkumbu Yehova to yakele puelele ve.

Mutindu kaka mpangi Rovira monisaka yau ti: “Beto lenda ndimisama ti Biblia yango kena kumonisa mabanza ya Nzambi na kukuikama nionso na ndinga na beto yina beto butukilaka.”

Beto kele na kiese mutindu bantu yina ketubaka ndinga ya Catalan kebaka kilendo ya Mpova ya Nzambi na mvimba na yau.—Baebreo 4:12.