Na kilumbu ya 19 Février 2022, mpangi Didier Koehler, yina kele mpangi ya komite ya filiale ya France samunaka kubima ya Biblia—Evanjile ya Matayo ya ndinga ya mababa ya buala ya France (LSF). Bantu lenda telesharje deja mukanda yango na jw.org mpe na aplikasion JW Library Sign Language. Yakele mukanda ya ntete ya Biblia Mbangudulu ya Yinza ya Yimpa yina Bambangi ya Yehova mebimisa na ndinga ya mababa ya buala ya France.

Bantu kana 1 500 talaka programe yango ya kubimisama ya Biblia. Na diskur na yandi, mpangi Koehler sasilaka ti: “Lokola ndinga ya mababa ya France kele ndinga yina bantu ketalaka, muntu yina kena kusala bidimbu nde kepesaka nsangu. Yilungi na yandi, meso na yandi, mpe nzutu na yandi kemonisaka banguilu mpe bikadulu ya bantu yina bakena kutubila. Beto lenda mona konso diambu yina bakena kutubila! Yau kesalaka ti yavuanda mpenza pete samu na kumona na makanisi masolo yina kele na Biblia!”

Bambangi ya Yehova kesamunaka na mutindu yina mebonga na ndinga ya mababa banda bamvula 1960. Na ebandeli ya bamvula 1970, kimvuka ya ntete na ndinga ya mababa salamaka na Vincennes penepene ya Paris. Na manima, na ebandeli ya bamvula 2000, Kimvuka ya Ntuadisi pesaka nzila na komite ya filiale ya France samu na kusala biro ya mbangudulu na ndinga ya mababa ya France. Na 2019, tekila COVID-19 banda, ekipi ya mbangudulu tindamaka na Betele ya France, yina kele na Louviers. Bubu yayi, buala ya France kele na bimvuka 11 ya ndinga ya mababa mpe bagrupe 39.

Mbangudulu ya Biblia ya ndinga ya mababa ya France bandaka na Evanjile ya Matayo. Evanjile ya Yoane kebima na bilumbu kena kuiza. Mikanda yango zole yina kena kutubila luzingu ya Yesu mezabana mbote, mpe lokola yaketubilaka disolo ya luzingu, yakele pete samu na kubangula yau kuluta mikanda yankaka ya Biblia. Tekila mukanda ya Matayo bimisama, bansamuni ya ndinga ya mababa vuandaka na mua baverse na ndinga ya mababa.

Mpangi mosi ya nketo ya dibaba yina kele na ekipi ya mbangudulu metuba: “Ntangu munu vuandaka muana fioti munu vuandaka tala mbala na mbala bafoto na mukanda Moto oyo alekaki bato nyonso kino lelo. Ntangu munu vuandaka tala mukanda ya Matayo na ndinga ya mababa ya France, bafoto yango nionso vuandaka vutukila munu na makanisi. Yakele mbala ya ntete na luzingu na munu munu bakusa mpenza nsangu.”

Mpangi yankaka ya ekipi ya mbangudulu metuba: “Munu vuandaka ntangu nionso na nsatu ya kuvuanda na Biblia na ndinga ya mababa ya France samu na bibuti na munu yina kele mababa. Kasi munu vuandaka kanisa ata fioti ve ti kilumbu kele munu kekota na ekipi ya mbangudulu. Mukanda ya Matayo na ndinga ya mababa kele dikabu ya kitoko!”

Kubimisama ya Biblia na ndinga ya mababa kena kupesa beto mpenza kiese. Yakena kumonisa puelele ti Yehova kena kubokidisa bantu nionso ‘babaka maza ya luzingu ofele.’—Kusonga 22:17.