Italie kele mosi ya babuala yina maladi ya yimbi ya COVID-19 kena kubaka bantu mingi. Na kulandaka malako ya Kimvuka ya Ntuadisi, filiale ya Italie kena kupesa lusadisu ya mbote ya kinsuni mpe ya kimpeve na bampangi na beto.

Bakomite ya lusadisu tatu kena kulungisa bansatu ya bampangi na beto yina kevuandaka na nord, na centre mpe na sud ya Italie. Bankulutu ya bimvuka kena kuzabisaka mbala na mbala bansatu ya bansamuni na bau na nkengidi ya kizungidila, nkengidi ya kizungidila kepesa nsangu na bampangi ya Bakomite ya lusadisu.

Katula bansatu ya kinsuni, bankulutu ya bimvuka kena kutuadisa bansamuni samu batatamana kusamuna mpe kusala balukutakanu. Mpangi Villiam Boselli, nkengidi ya kizungidila na Milan yina kele mosi na kati ya bambanza ya ntete yina maladi ya yimbi kena kutungisa mingi metuba: “Atako bakele ya kukangama na bayinzo na bau, kasi bampangi kena kutatamana kaka kusolola na bampangi yankaka. Mpe bakena kukindasana mpe kutubila kiminu na bau na balukutakanu yina kena kusalama na nzila ya videoconference. Ata bampangi yina mekuma biboba kena kubaka mambote mingi na balukutakanu yango. Mebanza ti bimvuka mekuma diaka na bumosi kuluta!”

Katula yau, bantu mingi yina kele Bambangi ya Yehova ve ketalaka balukutakanu yango kintuadi na bampangi ya dibuta na bau yina kele Bambangi ya Yehova. Mpangi mosi ya nketo metuba: “Bakala na munu kezolaka ve kukuenda na balukutakanu, kasi bubu yayi balukutakanu nde kena kuiza kukuta yandi na yinzo . . . Mpe beno mezaba yinki? Yandi kena kusepela na yau mingi!”

Bampangi kena kusadila konso diluaku samu na kupesa kimbangi. Na kifuani, ntangu mpangi mosi ya nketo vuandaka kuenda na voitire na yandi samu kubikila mpangi mosi ya kiboba velo ya makoka, na nzila, bapolisi tatu telemisaka yandi. Mpangi yango zabisaka bau ti yandi kena kukuenda sadisa mpangi mosi ya kiboba mpe yandi monisaka bau mukanda na yandi ya kutambudila. Na manima yandi pesaka mosi mosi na bau batrakte Nge mekanisa bilumbu kena kuiza yau kevuanda yinki mutindu? Mpe Kilumbu kele bampasi kemanisa? Bapolisi ndimaka yau. Ntangu mpangi yango vuandaka vutuka na yinzo na yandi, bapolisi yango telemisaka yandi diaka. Na mbala yai, bapesaka yandi matondo mpe bayuvusaka yandi yina Biblia metuba samu na kivuvu na beto na bilumbu kena kuiza. Kutu bapolisi bokilaka diaka bankundi na bau zole bakuiza kota na disolo yango. Mpangi na beto ya nketo vuandaka na kiese mingi ya kumonisa bau site na beto jw.org. Mosi ya bapolisi yango tubilaka yandi: Matondo, nge mesala ti beto vuanda na kilumbu mosi ya kiese bubu yayi!”

Mpangi Boselli mebuela: “Mosi ya biyekua na munu kele ya kukindisa batu yankaka, kasi kana munu memona bampangi kele ngolo na kimpeve mpe bakele na nzengolo ya kutatamana kaka, munu nde kebakaka lukindusu. Nzola na bau samu na Yehova kele mpenza ya kedika mpe ya ngolo, mpe yakebimisaka munu mansanga na meso. Bampangi na munu kele mpenza dikabu yina mekatuka na Yehova yina beto kevuandaka na nsatu na yau!”

Yakele kedika ti, atako mambu kele mpasi, bampangi na beto kena kubikana ngolo na kimpeve; ‘bampasi yayi kena ningisa’ bau ve.’—1 Batesalonika 3:2, 3.