Na kilumbu ya 4 mars 2022, nkubukulu yina ketadilaka mambu ya kalasi ya buala ya Kenya tulaka nsiku mosi yina kena kulomba na bamfumu ya baekole batanina kimpuanza ya nsambudulu ya bana kalasi. Beto kele na kivuvu ti nsiku yango kesadisa samu na kutanina yinsua ya bana ya Bambangi ya Yehova, yina kekutanaka na mikakatano yameluta bamvula mingi.

Banda 2015, yakele na bana 36 ya Bambangi ya Yehova yina bamekukaka na bakalasi samu na mvimbamvimba to samu na mua ntangu samu bamangaka kupesa maboko na bankinzi ya mabundu yina baekole kesalaka. Na 2018, bamonisi ya biro ya filiale ya Bambangi ya Yehova na Nairobi kutanaka na bamfumu ya Leta yina ketadilaka mambu ya kalasi ya Kenya samu na kulomba bau lusadusu ya kusosa mutindu ya kulemba kuniokola bana ya Bambangi ya Yehova. Na kifuani, na kilumbu ya 23 octobre 2018, bamonisi yango ya Bambangi ya Yehova kutanaka na Dr. Amina Mohamed, yina vuandaka sekretere ya mambu metadila kalasi na ntangu yango.

Nsiku yango ya guvernema kena kundima puelele ti “bantuadisi mpe badirektere kena kubimisa mambu mekondua mfunu samu na kupekisa bana bakuenda na baekole.” Nsiku yango memonisa ti “baekole yankaka kena kuzitisa ve yinsua ya bana kalasi na yina metadila nsambudulu mpe bakena kumanga kuyamba bana kalasi to kukuka bau samu na nsambudulu na bau.”

Bashene ya radio mpe televizion muangisaka nsiku yango na buala ya mvimba ya Kenya, na kutubaka ti “kumanga kuzitisa yinsua ya nsambudulu kele ve na nguizani na bansiku ya babuala mingi, mpe luwawanu yina mesangisa bizunga mpe babuala mingi, . . . mingimingi, Nsiku ya buala ya Kenya.” Na yau, bana ya Bambangi ya Yehova mpe bana ya kalasi yankaka kele na yinsua ya kumanga “kusangana na bankinzi yina kele ve na nguizani na nsambudulu na bau.” Nsiku yango mesukisa na kulombaka bamfumu ya baekole nionso bazitisa kimpuanza ya nsambudulu na baekole na bau.

Kimberly Nyang’ate, mpangi ya nketo ya bamvula 17, na mbanza ya Nairobi, metuba: “Bibuti na munu bokilaka ekole kuluta mbala 5 samu munu vuandaka manga kusangana na bankinzi ya dibundu. Munu kele na kiese samu nsiku yango ketanina nzengolo na beto ya kuzitisa Biblia.”

Beto kele na butondi na bamfumu ya leta samu na nzengolo na bau ya kutula nsiku yango, yina kesadisa bana na beto ya buala ya Kenya babikana ya kukangama na bindimeli na beto.—1 Bakorinto 15:58.