Na kilumbu ya 7 juin 2022, tribinale ya nene ya Europe yina ketadilaka yinsua ya bantu salaka nsambusulu mosi ya nene yina tadilaka buala ya Lituanie na diambu metadila mpangi Stanislav Teliatnikov, yina kikansasa na yandi pekisaka yandi kukota na kisalu ya kisoda. Tribinale ya nene ya Europe yina ketadilaka yinsua ya bantu bakaka nzengolo ti yinsua ya kumanga diambu yina kikansasa kena kupekisa kele yimbi na kutadila Article 9 (Kimpuanza ya makanisi, kikansasa, mpe ya dibundu) na kutadila luwawanu ya Europe yina ketadilaka yinsua ya bantu. Na yau, buala ya Lituanie zitisaka ve nsiku ya luwawanu yango mpe balombaka yandi yandi futa mpangi Stanislav ntalu ya mbongo ya badolare 3 196.

Babuala mingi yina kele na kati ya luwawanu yango ya Conseil de l’Europe tulaka programe mosi ya kisalu yina muntu lendaka soba kana yandi memanga kisalu ya kisoda na bisika yina mebonga samu na yau. Ntangu balombaka yandi yandi kota na kisalu ya kisoda, mpangi Stanislav lombaka basoba yandi kisalu yankaka na kisika ya kisalu ya kisoda na kutadila bansiku ya Conseil de l’Europe. Kasi, buala ya Lituanie kele ve na kisalu ya kusoba na kisika ya kisalu ya kisoda. Na nzengolo ya nsambusulu yina tribinale ya nene ya Europe bakaka samu na Lituanie, yina mefuanana na nzengolo yina yababaka samu na Arménie, Azerbaïdjan mpe Turquie, tribinale ya nene ya Europe bambulaka babuala nionso yina kele na luwawanu ya Conseil de l’Europe na kubaka bankubukulu ya kutula kisalu yina muntu lenda soba na kisika ya kisalu ya kisoda kondua ti kisalu yango vuanda yina kena kupesa kitumbu, yina kena kukabula bantu, kasi vuanda mpenza kisalu yina kele ve na nguizani na mambu ya kisoda.

Buala ya Arménie tulaka nkubukulu yango yina mebonga ya kusoba muntu kisalu na kisika ya kisalu ya kisoda. Bantuenia ya bakala yina kikansasa na bau tungisamaka samu na kisalu ya kisoda lenda sala kisalu ya mfunu yina lenda natina bantu mambote mingi.

Beto kele na kivuvu ti Lituanie kezitisa lutuadusu ya tribinale ya nene ya Europe yina ketadilaka yinsua ya bantu samu na kutula programe mosi ya kisalu yina muntu lendaka soba kana yandi memenga kisalu ya kisoda yina kenatina bampangi na beto mambote mpe bantu yankaka na bisika yina bakevuandaka. Kasi tekila nkubulu yango tulama na buala Lituanie, beto mezaba ti Yehova ketatamana kupesa bampangi na beto ya Lituanie lutuadusu mpe lusadusu yina bakele na yau nsatu.—Bidilu 3:25.