Na kilumbu ya 5 juin 2022, Biblia Mbangudulu ya Yinza ya Yimpa ya Masonukua ya Greki ya Buklisto bimisamaka na ndinga ya Iban. Bampangi mingi ya babakala mpe ya banketo kutakanaka na Yinzo ya Kimfumu samu na kulanda anrejistrema ya programe yango. Bansamuni yankaka landaka programe yango na nzila ya vidéoconférence. Biblia ya papie kebimisama na ngonda ya juillet to août 2022.

Ntangu bambangudi vuandaka bangula Biblia yango, yalombaka batula mbotembote dikebi na balusuasanu yina kele na ndinga ya Iban na mutindu yaketubukaka na bizunga ya kusuasana. Ekipe mosi yina sangisaka bantu ya bizunga mingi tangaka Biblia yango mpe basadisaka bambangudi bapona bampova yina bantu mingi yina ketubaka ndinga ya Iban lenda bakusa.

Mbangudulu yango ya yimpa kesadisa diaka bansamuni basasila bakedika ya Biblia na sikisiki na kisalu na bau ya kusamuna. Na kifuani, na ntama bansamuni vuandaka na mukakatano ya kusasila verse ya Yoane 4:24, yina kitini na yau ketubaka: ‘Bantu yina kesambilaka yandi fueti sambila yandi [Nzambi] na mpeve mpe na kedika.’ Na ebandeli, Babiblia ya ndinga ya Iban vuandaka bangula mbote ve mpova “mpeve” na mpova mosi yina memonisa “mpeve ya bantu ya kufua.” Yau salaka ti bantu yina kesepelaka na kedika bavuanda na mukakatano na kuzaba mutindu ya kusambila Nzambi.

Samu na kutubila valere ya mbangudulu yango ya yimpa, mbangudi mosi tubaka: “Kuvuanda na Biblia Mbangudulu ya Yinza ya Yimpa ya Masonukua ya Greki ya Buklisto na ndinga na beto kena monisa puelele nzola ya mpinda ya Yehova samu na bisadi na yandi.”

Beto kena kusambila samu mbangudulu ya Biblia yango ya yimpa sadisa bantu mingi kuluta yina ketubaka ndinga ya Iban samu babakusa mbotembote Biblia, bapusana penepene ya Nzambi, mpe bakumisa nkumbu ya Yehova.—Nkunga 117:1.