Na kilumbu ya 24 avril 2022, mpangi Frank Madsen, yina kele mpangi ya komite ya filiale na Malawi, tubilaka kubimisama ya Biblia Mbangudulu ya Yinza ya Yimpa ya Masonukua ya Greki ya Buklisto na mutindu ya kutanga na nzila ya apareyi na ndinga ya Chiyao. Bantu kana 148 000 landaka anrejistrema ya programe yango mbala mosi na nzila ya televizion na satelite, mpe na mitindu yankaka na kifuani, JW Box mpe na JW Stream. Kubimisama na yau na papie kesalama na bilumbu kena kuiza.

Biblia na ndinga ya Chiyao na mvimba na yau vuandaka deja banda 2014. Kasi, mbangudulu yango vuandaka na mua banzimbala mpe yakatulaka nkumbu ya Nzambi, Yehova, atako nkumbu yango vuandaka na bisika mingi na masonukua ya ebandeli.

Yau salaka ti bansamuni mingi vuanda na mukakatano samu na kusadila Babiblia yango na kisalu ya kusamuna na bisika ya bantu mingi. Mbangudi mosi tubaka: “Beto vuandaka lutisa ntangu mingi samu na kusasila bantu mfunu yina nkumbu ya Nzambi vuandaka monana ve na Biblia yango, na kisika ya kulonga bau mfunu ya nkumbu ya Nzambi.” Na kifuani, Biblia mosi na ndinga ya Chiyao mebangula kitini ya mukanda Matayo 22:44 mutindu yayi: “Mfumu tubilaka Mfumu na munu.” Nzokande, Biblia Mbangudulu ya Yinza ya Yimpa mebangula mbotembote verse yango mutindu yayi: ‘Yehova tubilaka Mfumu na munu.’

Na kukanisaka na mambote yankaka yina mbangudulu yango mebimisa, mbangudi yankaka tubaka: “Lokola Biblia Mbangudulu ya Yinza ya Yimpa ya Masonukua ya Greki ya Buklisto kele puelele mpe pete samu na kutanga, bantu kebakusa mbala mosi nsangu na yau mpe yaketinda bau basadila mambu yina bakena kulonguka.”

Beto kena kusepela mutindu beto kele na Biblia yango yina kena kusadisa bamilion ya bantu yina ketubaka ndinga ya Chiyao samu bazaba nkumbu ya Yehova, “Muntu yina Meluta Zulu na ntoto ya mvimba,” mpe bapusana penepene na yandi.—Nkunga 83:18.