Filiale ya Malawi bakaka bankubukulu samu balukutakanu luta na ba chaines ya televizio mpe ya radio ya buala. Balukutakanu yango na nzila ya televizio mpe ya radio kena kusimba mintima kaka ya bampangi na beto ve kasi mpe ya bantu mingi yankaka. Bambangi ya Yehova na Malawi kele kuluta 100 000, kasi ba sociétés ya ba chaines ya televizio mpe ya radio mebakusa ti konso nsuka ya sabala bantu 2 000 000 kelandaka balukutakanu na televizio mpe 8 000 000 ya bantu kelandaka yau na radio.

Bubu yayi na Malawi mpe babuala yankaka, bampangi na beto kena kukutakana ve na Bayinzo ya Kimfumu, samu na maladi ya Covid-19. Bansamuni mingi kele na dikoki ya kulanda balukutakanu na televizio to na radio. Na yau, nkubukulu yango kena kusadisa bantu nionso samu balanda balukutakanu, ata mpe bayina kele ve na dikoki ya kusadila Internet, to bayina kele na dikoki ve ya kusadila videoconference.

Balukutanu yango kesalamaka na ndinga ya Chichewa, yina kele ndinga ya ntete ya buala. Balukutanu nionso kebanguluaka mbala mosi na ndinga ya mababa. Katula diskur ya bantu nionso, lukutakanu na nsuka ya sabala kevuandaka na bavideo to masolo ya ntangulu ya Biblia. Na nsuka ya lukutakanu, bantu kekindusuaka na kukota na jw.org samu na kuzaba mambu yankaka na bandinga mingi.

Balukutakanu na nzila ya televizio mpe ya radio katulaka mambu ya yimbi yina bantu ketubaka samu na Bambangi ya Yehova. Bakala mosi sonikaka: “Mulandaka Badiskur na beno na radio basabala nionso yayi meluta. Yau kena kukatula mabanza nionso ya yimbi yina bantu ketubaka samu na beno. Badiskur na beno kele ya kusuasana na ya mabundu yankaka. Yakena kusimba mintima!” Bakala yango na dibuta na yandi bandaka kulonguka Biblia na Bambangi ya Yehova.

Augustine Semo, yina ketuadisa kisalu ya relations publiques na Malawi, metuba: “Balukutakanu yango na nzila ya televizio mpe radio kele kisadulu mosi ya mbote samu na kusadisa bampangi na beto na kutatamana kusala mambu na bau ya kimpeve. Yapesaka diaka maluaku na bantu yankaka yina kele Bambangi ya Yehova ve babakusa diaka malongi ya Biblia. Ntangu mambu kevutuka mbote na Malawi, beto kele na kivuvu ya kumona bantu mingi ya yimpa yina kekuiza sangana na beto na Yinzo ya Kimfumu.”

Beto kele na kiese ya kuzaba ti na Malawi, bampangi na beto, mpe bantu yankaka kena kudia madia ya kimpeve na ntangu yayi ya mpasi. Yau kena kukudisa butondi na beto na ‘nanga ya kukuikama’ yina kena kusala nionso samu konso muntu baka madia ya kimpeve.—Matayo 24:45.