Nkubukulu ya yimpa ya Bambangi ya Yehova yina mezabana na nkumbu ya Jehovah’s Witnesses in Malta (JW-Malta) sonamaka ntama mingi ve na Leta na buala ya Malte. JW-Malta bakaka mukanda yina memonisa ti yamendimama na Leta na kilumbu ya 28 décembre 2021.

Nkubukulu ya Bambangi ya Yehova na Malte bandaka banda bamvula 1970. Na yau, banda bamvula mingi, bimvuka ya Bambangi ya Yehova zabanaka kaka fioti to ve na Leta. Yavuandaka mpenza mpasi samu na bimvuka yango na kuvuanda na bima ya bau mosi to ya kuzibudisa bakonte na banke. Na 1994, Nkubukulu ya yinza ya mvimba ya banlonguki ya Biblia kumaka nkubukulu yina vuandaka ve ya kusonama na Leta na buala ya Malte. Atako nkubukulu yango vuandaka baka mambote na bayinsua yankaka, kasi yavuandaka mpenza na ndilu. Kuzabana ya yimpa ya JW-Malta na Leta mesala ti babiro ya buala banda kusala mbote buela diaka bimvuka na Malte.

Na diambu metadila kundimama yango na Leta, mpangi Joe Magri, yina kele mosi ya mpangi ya komite ya buala ya Malte, tubaka: “Yakumisaka kiminu na beto ngolo kumona mutindu Yehova sadisaka beto beto ndimama na Leta. Yandi sakumunaka beto na nzila ya lusadusu ya bampangi ya Departema ya kusamba ya Grande-Bretagne mpe ya biro ya nene yina pesaka mpenza maboko na kununga ya diambu yango. Beto kele mpenza na kiese ya kupesa maboko na Kimfumu mpe kukumisa diaka mingi Yehova samu bubu yayi nkubukulu na beto mendimama na Leta.”

Bubu yayi, yakele na Bambangi ya Yehova kuluta 800 yina mekabulua na bimvuka 11 na Malte. Beto kele na kiese kumona mutindu kisalu ya “kusamuna Kimfumu ya Nzambi,” yina ntumua Paulo bandaka na Malte yameluta bamvula 2 000, kena kutatamana kukuenda na ntuala ‘kondua kupekisama.’—Bisalu 28:1, 30, 31.