Na kilumbu ya 27 Février 2022, Mpangi Carlos Cázares, yina kele mpangi ya komite ya filiale ya Amérique centrale, tubilaka kubimisama Mbangudulu ya Yinza ya Yimpa ya Masonukua ya Greki ya Buklisto ya kutanga na bapareyi na ndinga ya Tlapanec. Bantu lenda baka Biblia yango ya papie na manima ya mvula yayi. Bantu kana 820 talaka video ya programe yango yina baanrejistreke.

Proje ya kubangula yau bandaka na ngonda ya Juillet 2020, na ntangu ya maladi ya yimbi ya COVID-19. Mbangudi mosi tubaka, “Atako beto kutanaka na mambu mingi ya mpasi, yavuandaka diambu ya kukamua samu na beto kumanisa proje yango na mvula mosi na ndambu. Yehova salaka ti yasalama na nsualu.”

Biblia yango kele na bampova yina kele puelele samu na bantu yina ketanga yau. Beto lenda mona yau na kifuani na Matayo 5:3. Bambangudulu yina kevuandaka deja mebangulaka yau mutindu yayi: “Kiese kevuanda na bantu yina mezaba ti balenda sala diambu mosi ve kondua ti mpeve ya nlongo sadisa bau,” to “Kiese na bantu yina kele na mpeve ya kulemba.” Na ndambu na yau, Mbangudulu ya Yinza ya Yimpa ya Masonukua ya Greki ya Buklisto metuba: “Kiese na bantu yina kebakusaka ti bafueti sosa Nzambi.”

Mbangudulu yango ya yimpa kesadisa bansamuni samu basala diaka mbote kisalu ya kusamuna. Na ntangu ya diskur na yandi, Mpangi Cázares tubaka: “Nzambi Nkua ngolo nionso zola bantu kuwa nsangu ya mbote na bandinga na bau, yina baketubaka konso kilumbu, kasi ve na bandinga yina bakebakusaka na mpasi.”

Beto kele na kiese mingi samu na bampangi na beto ya Tlapanec samu na kubimisama ya Biblia mpe beto kele na kiese ya kusadila Yehova “dipeka na dipeka” kintuadi na bau.—Sefania 3:9.