Ngonda ya mars 2022 kele aniversere ya bamvula 75 banda kisalu ya Bambangi ya Yehova mendimamaka na Leta ya Nouvelle-Zélande. Na kilumbu ya 7 mars 1947, mpangi Nathan H. Knorr, mpangi Milton Henschel, mpe mpangi Charles Clayton, yina vuandaka misionere ya ntete na Nouvelle-Zélande yina salaka kalasi ya Gileade, bakuendaka na parlema ya Nouvelle-Zélande. Bamfumu ya Leta pesaka bampangi na beto badokima yina monisaka ti kisalu ya Bambangi ya Yehova mendimama na Leta. Bubu yayi kisalu ya kusamuna kena kutatamana kukuenda na ntuala, mpe bansamuni kana 14 500 kena kusamuna na vema na buala yango.

Nsangu ya Kimfumu kumaka na Nouvelle-Zélande samu na mbala ya ntete na 1898. Ntalu ya bansamuni vuandaka buelama mbala na mbala. Dibundu ya Katoliki kumaka na nganzi na mutindu mikanda na beto vuandaka monisa kedika ya Biblia, na yau batindaka bantu batelemina Bambangi ya Yehova. Na kilumbu ya 24 octobre 1940, bamfumu ya Leta pekisaka kisalu na beto ya kusamuna. Kasi na kilumbu ya 8 mai 1941, parlema tadilaka diaka bipekiseli yango, mpe bapesaka bampangi yinsua ya kukutakana mpe kuvutukila kisalu ya kusamuna. Kasi, yalombaka basadila kaka Biblia kasi mikanda na beto ve yina kesasila Biblia. Na kilumbu ya 29 mars 1945, Leta katulaka bipekiseli yango, mpe ntalu ya bansamuni bandaka kubuelama diaka. Kaka na manima ya bamvula zole, ntalu ya bansamuni ya Kimfumu buelamaka mbala zole kuluta mbala ya ntete, yina kumaka na ntalu ya bampangi ya babakala mpe ya banketo 659 yina vuandaka samuna nsangu ya mbote.

Ntangu mpangi Knorr vuandaka sala vuayaje na yandi ya yinza ya mvimba, yandi bakaka nzengolo ya kukuenda na Nouvelle-Zélande na 1947. Yavuandaka na vuayaje yango nde yandi kuendaka na parlema.

Na manima ya kubaka yinsua ya Leta, biro ya filiale tulamaka na mbanza ya Wellington samu na kubongisa mbotembote kisalu ya kusamuna. Mpangi Robert Lazenby ponamaka lokola mpangi ya ntete yina salaka na komite ya filiale.

Na yina metadila biro ya filiale yango ya yimpa mpe kubuelama ya bansamuni, mpangi Knorr sonikaka lapolo yina metadila Nouvelle-Zélande: “Bampangi nionso vuandaka na nsatu ya kubaka biyekua ya yimpa samu na kupesa maboko na filiale yango mpe konso muntu kena kuzitisa malako.”

Na kilumbu ya 8 mpe 9 mars 1947, mpangi Knorr mpe mpangi Henschel salaka badiskur na lukutakanu mosi ya spesiale yina salamaka na salle de mairie na mbanza ya Wellington, kitini ya manima ya midi salamaka na ekole mosi ya teknike yina vuandaka pembeni ya mairie. Bampangi pene ya 500 sanganaka na lukutakanu yango.

Mpangi ya nketo Beryl Todd, yina vuandaka na bamvula 17 na ntangu yango, kena kubambuka diaka ti: “Yavuandaka lukutakanu mosi ya nene yina munu salaka kutakana na yau ve na luzingu na munu, mpe yavuandaka diambu ya kiese na mutindu mpangi Knorr vuandaka na lukutakanu yango.” Mpangi Clyde Canty, yina kumaka na manima ntuadisi ya komite ya filiale ya Nouvelle-Zélande, bakaka mbotama na kilumbu yango na pisini mosi ya nene.

Na kilumbu ya 10 mars 1947, bantu 300 sanganaka kintuadi na mbanza ya Auckland samu na kulanda badiskur ya mpangi Knorr, Henschel, mpe mpangi Lazenby. Mpangi Knorr bakusaka ti na bilumbu kena kuiza kisalu kebuelama na Nouvelle-Zélande. Yandi tubaka: “Munu mendimisama ti kisalu ya kusamuna kekuenda na ntuala na buala yayi.”

Bampova ya mpangi Knorr vuandaka kedika. Ntalu ya bansamuni na Nouvelle-Zélande buelamaka na mutindu mosi ya kukamua na bamvula 8 yina landaka. Na 1955, ntalu ya bansamuni vuandaka 2 519. Na 1989, ntalu ya bansamuni kumaka 10 000 na buala yango.

Beto kele na butondi na Yehova na mutindu yandi sadisaka bampangi na beto basamuna nsangu ya mbote na Nouvelle-Zélande na kutadila minsiku ya Leta.—Bafilipi 1:7.