18 MAI 2022
POLOGNE

Bavolontere mpe bampangi yina kuendaka na Pologne samu na kutina Ukraine bakaka viziti mosi ya spesiale

KUWA NA

Na kilumbu ya lumingu 1 mai 2022, mpangi Mark Sanderson ya Kimvuka ya Ntuadisi ya Bambangi ya Yehova, kintuadi na bampangi tatu ya komite ya filiale, kuendaka tala bampangi ya babakala mpe ya banketo yina kuendaka na Pologne samu na kutina Ukraine. Ntangu bavuandaka sala viziti yango, mpangi Sanderson mpe bampangi yina vuandaka kintuadi na yandi kuwaka na dikebi nionso masolo ya bampangi yina tinaka mpe babambulaka bau ti Kimvuka ya Ntuadisi kezolaka bau mpe yaketatamana kupesa bau lusadusu.

Kubanda na diboko ya kinketo tii na diboko ya kibakala: Mpangi Tomasz Wolczko ya komite ya filiale ya Pologne, mpangi Mark Sanderson, mpangi Vesa Väänänen ya komite ya filiale ya Pologne, mpe mpangi Tommi Kauko ya komite ya filiale ya Finlande

Na frontiere, bampangi kena kutubila mutindu ya kupesa lusadusu

Na bilumbu 6 yina basalaka, grupe ya bampangi yango salaka vuayaje ya bakilometre kuluta 2 500 samu na kutala bampangi yina tinaka, yina kele na bisika mingi, buela diaka bayina kele na Bayinzo ya balukutakanu ya nene 4 mpe na Bayinzo ya Kimfumu mingi. Bakutanaka diaka na bavolontere yina vuandaka na frontiere yina mekabula Pologne mpe Ukraine.

Mpangi mosi ya buala ya Ukraine tubaka: “Viziti yango natinaka beto lukindusu mpe yabombaka beto lokola maza madidi na kilumbu mosi ya muini.”

Mpangi mosi ya nketo ya buala ya Ukraine tubaka: “Viziti yango vuandaka diambu mosi ya kukamua! Yamemonisa ti Yehova ketudilaka beto mpenza dikebi.”

Mpangi ya nketo yankaka ya buala ya Ukraine tubaka: “Ntangu beto kumaka na Pologne, beto vuandaka ata na kima mosi ve, kasi na lusadusu ya Yehova, beto bakaka bima yina beto vuandaka na yau nsatu.”

Grupe ya banati ya ntomabilu mpe bavolontere yankaka na nganda ya Yinzo ya balukutakanu ya nene ya Stęszew, na Pologne

Bampangi yango kutanaka diaka na bavolontere yina vuandaka sadisa bampangi yango yina tinaka. Mpangi Sanderson bambulaka bau ti Kimvuka ya Ntuadisi kezolaka bau na kutubilaka bampova yina kele na Baebreo 6:10 mpe yandi sasilaka bau ti Yehova ‘kezimbakana ve kisalu na bau.’ Yandi buelaka, “Beto diaka beto lenda zimbakana yau ata fioti ve.” Bavolontere tubaka ti bakele na butondi mingi na mutindu bakele na dikoki ya kusadisa bampangi na bau ya babakala mpe ya banketo.

Bakena kutala bampangi ya banketo ya biboba yina mekatuka na Ukraine na ntuala ya Yinzo ya Kimfumu na Radymno, na Pologne

Mpangi Vesa Väänänen, mpangi ya komite ya filiale ya Pologne, tubaka: “Yakumisaka kiminu na munu ngolo kumona mutindu Yehova kena kutuadisa konso diambu. Yehova kepesaka beto mpenza yina beto kele na yau nsatu na ntangu yina mebonga na nzila ya balutuadusu yina kekatukaka na Kimvuka ya Ntuadisi mpe na nzila ya bampangi ya babakala mpe ya banketo ya kimpeve yina kevuandaka ntangu nionso pene ya kupesa lusadusu.”

Bavolontere na kati ya Yinzo ya balukutakanu ya nene ya Stęszew, na Pologne, kisika bakena kubongisa bima samu na kupesa lusadusu

Lokola bampangi na beto ya babakala mpe ya banketo kena kutatamana kupesa beto lusadusu yina beto kele na yau nsatu, yavuanda na yinki diambu, bakevuandaka na kiese ya kupesa mutindu Yesu tubaka yau.—Bisalu 20:35.